بالالارعا ارنالعان «ءتاتتى الما» ادەبي جيناعى جارىق كوردى

نۇر-سۇلتان. قازاقپارات - ەلورداداعى نازاربايەۆ ورتالىعىندا «ءتاتتى الما» بالالار ادەبيەتى جيناعى مەن ۆەب-گرافيكالىق رومانداردان تۇراتىن «ۇلى دالا اڭىزدارى» اتتى ونلاين-جوبانىڭ تۇساۋى كەسىلدى، دەپ حابارلايدى قازاقپارات.

«ءتاتتى الما» جيناعىنىڭ 1-2- تومى ق ر تۇڭعىش پرەزيدەنتى-ەلباسى ن. نازاربايەۆتىڭ مەملەكەتتىك ءتىلدى دامىتۋ قورىنا انا ءتىلىمىزدى دامىتۋ باعىتىنداعى جوبالارعا بولگەن قارجىسىنا 2015-جىلى جارىق كورگەن ەدى. اتالعان جيناقتىڭ 3-4- تومدارىن شىعارۋعا ق ر تۇڭعىش پرەزيدەنتى- ەلباسى قورى قولداۋ كورسەتتى.

تۇڭعىش پرەزيدەنت قورىنان ءمالىم ەتكەندەي، سوڭعى جيناقتارعا جاقسىلىق پەن اسەمدىك، تابيعاتقا دەگەن قامقورشىلىق تۋرالى ەرتەگىلەر مەن تەاترلىق قويىلىمدار ەنگەن. جيناققا ەنگەن بارلىق شىعارمالاردى «Tattialma.kz» سايتىنان جانە «Tattialma» موبيلدىك قوسىمشاسىنان وقۋعا بولادى.

«رۋحاني جاڭعىرۋ» باعدارلاماسى مەن ەلباسىنىڭ «ۇلى دالانىڭ جەتى قىرى» ماقالاسىندا ايتىلعان يگى ماقساتتاردى جۇزەگە اسىرۋ اياسىندا، قور قازاق حالقىنىڭ مادەني، ادەبي جانە رۋحاني جەتىستىكتەرىن دامىتۋعا باعىتتالعان جۇمىستارىن جالعاستىرىپ كەلەدى.

وسىعان وراي، «ۇلى دالا اڭىزدارى» (لەگەندى ۆەليكوي ستەپي) ونلاين جوباسى اياسىندا ۆەب-گرافيكالىق روماندار سەرياسىن ازىرلەۋدى قولعا الىپ، قازاق، ورىس جانە اعىلشىن تىلدەرىندەگى «Qazcomics.kz» ۆەب-سايتى مەن موبيلدىك قوسىمشاسى ازىرلەندى.

«ۇلى دالا اڭىزدارى» جوباسى عاسىردان-عاسىرعا، ۇرپاقتان-ۇرپاققا جەتكەن قازاق حالقىنىڭ تاريحى مەن اڭىزدارى تۋرالى سىر شەرتەتىن «ۇلى ماحاببات تۋرالى جەتى حيكايا» جانە «قازاق جەرىنىڭ ۇلى باتىرلارى» دەپ اتالاتىن ەكى بولىمنەن تۇرادى. اڭىزدار مازمۇنى قازاقستاننىڭ كيەلى ورىندارىنىڭ تاريحىمەن استاسىپ جاتىر. اڭگىمەلەر ارقاۋى كوپشىلىككە كيەلى جەرلەر تۋرالى تولىعىراق مالىمەت الۋعا مۇمكىندىك بەرەدى.

قازىرگى تاڭدا وسى سەريادان «قوزى-كورپەش - بايان سۇلۋ» جانە «جۇمباقتاس» تۋىندىلارى جارىق كوردى.

شاراعا ق ر تۇڭعىش پرەزيدەنتى-ەلباسى قورى اتقارۋشى ديرەكتورىنىڭ ورىنباسارى - سۇلتان ايتجانوۆ، مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ، بەلگىلى قوعام قايراتكەرلەرى مەن وقۋشىلار قاتىستى.