التىن بولۋى ىقتيمال ايماقتاردا بارلاۋ جۇمىستارى جۇرگىزىلىپ جاتىر

نۇر-سۇلتان. قازاقپارات - «قازگەولوگيا» ا ق دالا جۇمىستارىنىڭ ماۋسىمىن اشتى. اعىمداعى جىلعى ساۋىردە قاراعاندى وبلىسىنىڭ ءۇش شوقى ۋچاسكەسىندە بىلتىر باستالعان بۇرعىلاۋ جۇمىستارى جالعاسىن تاپتى، دەپ حابارلايدى قازاقپارات كومپانيانىڭ باسپا ءسوز قىزمەتىنە سىلتەمە جاساپ.

«ۋچاسكەدە توپوگرافيالىق-ماركشەيدەر جۇمىستارى ورىندالىپ، رەكوگنوستسيروۆكالىق ءارى تەكسەرۋ-ىزدەۋ مارشرۋتتارى سالىندى. سونداي-اق ZTEM ءادىسى قولدانىلعان اەروگەوفيزيكالىق جۇمىستار جۇرگىزىلدى. وسىنىڭ ناتيجەسىندە تاريحي ماتەريالدارمەن بىرگە گەوفيزيكالىق دەرەكتەردى ەگجەي-تەگجەيلى زەرتتەۋ ءارى ولارعا كەشەندى تالداۋ جاساۋ ناتيجەسىندە باعالاۋعا ۇسىنىم بەرىلگەن 7 پەرسپەكتيۆالى اۋماق انىقتالدى. اسىرەسە، جارساي جانە قويىس ۋچاسكەلەرى ەرەكشە قىزىقتىرىپ وتىر» دەلىنگەن كومپانيا تاراتقان حابارلامادا.

قويىس ۋچاسكەسىندە التىننىڭ مينەرالدانۋى قايتالاما كۆارتسيتتەردىڭ كۆارتس-سەريتسيتتى جانە مونوكۆارتستى قۇرامىمەن بايقالدى. ولار كەيىنگى ديەۆون جاسىنداعى ۆۋلكانوگەندى قاتپاردىڭ جوعارعى قاباتىندا ورىستەگەن قىشقىل ۆۋلكانيتتەرمەن بايلانىستى.

جارساي ۋچاسكەسىندە التىننىڭ مينەرالدانۋى كوكقۇدىق توبەسى كەشەنىنىڭ كەيىنگى ديەۆون داۋىرىندەگى مونتسوديوريتتى پورفيريتتەر انىقتالعان جانە ۇزاقتىعى 250 - 650 مەتر، قۋاتى  250مەترگە دەيىن كۆارتستەلگەن ايماقتارمەن بايلانىستى.

انىقتالعان قۇبىلىستاردى باعالاۋ ءارى كونتۋرلارىن جاساۋ ءۇشىن 200-600 مەترگە دەيىن ۇڭعىمالار بۇرعىلاناتىن بولادى.

2019-جىلى جالپى كولەمى 5000 پيكومەتر 16 ۇڭعىما بۇرعىلانادى. قازىرگى ۋاقىتتا 2 ۇڭعىمانى بۇرعىلاۋ اياقتالىپ قالدى.