ۇيىقتار الدىندا ايتىلاتىن ەرتەگىنىڭ پايداسى بار ما؟
1. عالىمداردىڭ زەرتتەۋ ناتيجەلەرى بويىنشا، بالاعا ۇيىقتار الدىندا 15 مينۋت بويى ەرتەگى ايتىپ بەرسەڭىز، بالاڭىز تاربيەلى، اشىق، باتىل، اقىل تىڭدايتىن، ۇقىپتى بولىپ وسەدى. ارينە «بوس ءسوز» دەپ ساناۋىڭىز مۇمكىن، ال نەگىزىندە ول ەرتەگى وقىماۋدىڭ سىلتاۋى عانا.
2. ەرتەگىنى تىڭداپ بولعاننان كەيىن ونى تالقىلاساڭىز بالانىڭ ءوز بەتىمەن وقۋعا ىنتاسى پايدا بولادى. ءارى ويلاۋ قابىلەتى دامىپ، سوزدىك قورى كەڭەيەدى.
3. ەرتەگى - بالانىڭ ءتىلىن جاتتىقتىرادى. ەرتەگى كەيىپكەرلەرى، ولاردىڭ باسىنان وتەتىن وقيعالارى ارقىلى بالا كۇندەلىكتى نارسەلەردى تالداي ءبىلۋدى جانە الەمدى ءتۇسىنۋدى ۇيرەنەدى. ەرتەگىلىك الەم تۇسىنۋگە جەڭىل: جاقسى مەن جاماننىڭ اراسى انىق. سونىمەن قاتار بالانىڭ ويلاۋ قابىلەتىندە ماڭىزدى نارسەلەر دە كورىنىس تابادى. ياعني جومارتتىلىق پەن ساراڭدىق، جاقسىلىق پەن جاماندىق، مەنمەندىك پەن باۋىرمالدىق دەگەن ماسەلەلەر كوتەرىلىپ، نەگىزگى يدەيا رەتىندە باياندالادى.
4. ەرتەگى - تاربيە قۇرالى. بالالار وزدەرىن ەرتەگى كەيىپكەرلەرىنە تەڭەپ، سولارعا ەلىكتەيدى. وزىنە ۇقساسىن بەيسانالى تۇردە تاڭداپ، سونىڭ ارەكەتتەرىن قايتالاۋعا تىرىسادى. سوندىقتان بالاعا وقۋعا ەرتەگى تاڭداۋدا مۇقيات بولىڭىز.
5. ەرتەگى وقۋ - بالانى تىنىشتاندىرىپ، پوزيتيۆكە باعىتتاۋدىڭ ءادىسى. بالا ەش ۋاقىتتا نەگاتيۆتى كوڭىل- كۇيدە ۇيىقتاماۋى كەرەك. ەرتەگىنىڭ سوڭى جاقسى اياقتالۋى كەرەك ەكەنىن دە ەسكەرىڭىز. ەرتەگىدە جاقسىلىق جاماندىقتى جەڭىپ، باس كەيىپكەر باتىر اتانىپ، ءبارى ءوز ورنىنا كەلەدى. بۇل بالانى ومىردە ءبارى جاقسى بولاتىنىنا، پوزيتيۆتى ويلاۋعا داعدىلاندىرادى. بۇل بالا ءۇشىن وتە ماڭىزدى ەكەنىن ۇمىتپاعايسىز.
6. ەرتەگى بالانى تۇسىنۋگە كومەكتەسەدى. كەيبىر بالالار ءبىر ەرتەگىنى قايتا-قايتا سۇرايدى. دەمەك بالا ول ەرتەگىدە ءوزىن تولعاندىراتىن، قورقىتاتىن نەمەسە قۋانتاتىن ءبىر نارسەنى ەستيتىن بولىپ تۇر. ەگەر بالا تولاعاي تۋرالى ەرتەگىنى قايتا-قايتا سۇراسا، دەمەك ول كەيىپكەردەي مىقتى، باتىر بولعىسى كەلەدى. ەگەر بالاڭىزدا دوستارىمەن ءبىر پروبلەمالارى بولسا، ونىڭ شەشىمى مازمۇنىندا بار ءبىر ەرتەگى تاۋىپ الىڭىز.
بالالارعا ەرتەگى وقۋدىڭ ماڭىزدى ەكەنىن ۇمىتپاڭىز. بۇل ەكەۋارا قارىم-قاتىناستى دامىتىپ، ءبىر- بىرىڭىزگە دەگەن سەنىم مەن ماحابباتتى نىعايتادى.
دەرەككوز: Reactor