اقتوبەدە «حان مولاسى» قورشالىپ، جامانشىڭ كراتەرىنە ەكسپەديتسيا جىبەرىلەدى
ال الەمگە ايگىلى جامانشىڭ كراتەرىندە زەرتتەۋ جۇمىسى جالعاسىپ، حالىقارالىق ەكسپەديتسيا جولعا شىعادى، دەپ حابارلايدى قازاقپارات ءتىلشىسى.
«رۋحاني جاڭعىرۋ» باعدارلاماسى اياسىندا قازاقستاننىڭ كيەلى جەرلەرى انىقتالىپ، ارنايى ءتىزىم دە جاسالدى. 100 كيەلى جەردىڭ قاتارىنا اقتوبەدەن 10 نىسان كىرگىزىلدى. تاريحي ورىنداردىڭ قۇندىلىعىن ساقتاۋ، جاڭعىرتۋ جۇمىستارى اقتوبەدە دە جۇرگىزىلەدى.
«بيىل وبلىستىق پلانەتاري «رۋحاني جاڭعىرۋ» باعدارلاماسى اياسىندا جامانشىڭ مەتەوريتتىك كراتەرىنە ەلىمىزدىڭ جانە شەتەلدىك عالىمداردىڭ، تۋريستىك اگەنتتىك وكىلدەرىنىڭ قاتىسۋىمەن حالىقارالىق ەكسپەديتسيا ۇيىمداستىرۋ جوسپارلاپ وتىر. كراتەردىڭ العاشقى زەرتتەۋشىلەرىنىڭ ءبىرى رەسەي جاراتىلىستانۋ عىلىمدارى اكادەمياسىنىڭ اكادەميگى پ. ۆ. فلورەنسكيي، الماتى قالاسىنداعى ۆ. گ. فەسەنكوۆ اتىنداعى استروفيزيكا ينستيتۋتى، ماسكەۋدەگى رەسەي عىلىم اكادەمياسىنىڭ عارىشتىق زەرتتەۋلەر ينستيتۋتىنىڭ عىلىمي قىزمەتكەرلەرى مەن استانا قالاسىنداعى قازاق گەوگرافيالىق قوعامىنىڭ وكىلدەرى قاتىسادى دەگەن جوسپار بار. عىلىمي- زەرتتەۋ ەكپەديتسياسىنىڭ قورىتىندىسى بويىنشا حالىقارالىق دەڭگەيدە كونفەرەنتسيا ۇيىمداستىرىلىپ، وندا كراتەردى قورعاۋ، وعان تۋريستەردى تارتۋ ماسەلەلەرى قارالىپ، ماتەريالدار جيناق بولىپ شىعارىلادى»، - دەيدى اقتوبە وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى مارجان قورعانبايەۆا.
بيىل ويىل اۋدانىنداعى كەرۋەن ساراي كەشەنى، العا اۋدانىنداعى شاكەن يشان مەشىتى مەن ىرعىز اۋدانىنداعى المات تامىنا رەستاۆراتسيا جاسالادى. قوبدا اۋدانىنداعى قىز اۋليە كەسەنەسىنە كونسەرۆاتسيا جاسالىپ، ايتەكە بي، العا، قوبدا، مۇعالجار، ويىل، تەمىر، شالقار اۋداندارىنداعى 14، اقتوبە قالاسىنداعى 22 ەسكەرتكىشكە QR- كود ورناتۋ جانە ولارعا 3 تىلدە ۆەب- سايت جاساۋ جوسپارعا ەنگىزىلدى.
اقتوبە وبلىستىق مادەنيەت باسقارماسى 2017 -جىلى «قاز رەستاۆراتسيا» عىلىمي- زەرتتەۋ جوبالىق فيليالىمەن بىرلەسىپ ابات- بايتاق قورىمىندا ورنالاسقان قىز اۋليە كەسەنەسىنە جانە كەرۋەن ساراي تاريحي- ارحيتەكتۋرالىق كەشەنىنە جوبالىق- سمەتالىق قۇجاتتامالار دايىندادى. سونىمەن قاتار العا اۋدانىنداعى شاكەن يشان مەشىتىنە رەستاۆراتسيا جاساۋ ءۇشىن «شاكەن يشان» قورى ارقىلى 100,9 ميلليون تەڭگەگە جوبالىق- سمەتالىق قۇجاتتاما دايىندالدى. سونداي- اق «قازرەستاۆراتسيا» عىلىمي- زەرتتەۋ جوبالىق فيليالىنىڭ ماماندارى بيىل شالقار اۋدانىنداعى رەسپۋبليكالىق ماڭىزى بار توقپان ماۆزولەيىندە بولىپ، فوتوفيكساتسيا مەن ولشەۋ جۇمىستارىن جۇرگىزدى. ەندى جوبالىق سمەتالىق قۇجاتتاماسى دايىندالادى. بايعانين اۋدانىنداعى قاراساقال قورىمىندا ورنالاسقان 1 كەسەنە مەن 2 ساعاناتامدى رەستاۆراتسيالاۋ باستالادى. وعان رەسپۋبليكالىق بيۋدجەتتەن 17 ميلليون تەڭگە ءبولىندى.
بيىل ايتەكە بي اۋدانىنداعى ءابىلقايىر حان جەرلەنگەن «حان مولاسى» قورىمىن قورشاۋ جۇمىستارىنا قاجەتتى جوبالىق- سمەتالىق قۇجات ازىرلەنەدى. ءارى قاراي جول سالۋ، ينفراقۇرىلىم تارتۋ جۇمىسى جۇرگىزىلەدى.
«قازاقستاننىڭ كيەلى جەرلەرىنىڭ گەوگرافياسى» ارنايى جوباسى اياسىندا كيەلى جەرلەر تۋرالى دەرەكتى فيلمدەر، كىتاپ جانە كارتاسى ازىرلەنىپ، دوسجان يشان، ساڭكىباي باتىر، نۇرلەپەس اتا، جيەنالى حازىرەت، نۇرپەيىس بايعانين ەسىمدەرىن ۇلىقتاۋ، جاس ۇرپاققا مۇرا ەتىپ قالدىرۋ باعىتىنداعى شارالار تۇراقتى جۇرگىزىلەتىن بولادى. سونىمەن قاتار قالماققىرعان ەلدى مەكەنىندە قازاق باتىرلارىنا ارنالعان ەسكەرتكىش قويۋدى «تۋعان جەرگە تاعزىم» اكسياسى اياسىندا قولعا الىپ وتىرمىز»، - دەپ ءمالىم ەتتى تەمىر اۋدانىنىڭ اكىمدىگى.
اۆتور: التىناي ساعىندىقوۆا