باسپاءسوز مالىمەتتەرىنە قاراعاندا، كورمەنىڭ اشىلۋ سالتاناتىنا قازاقستان رەسپۋبليكاسى ۇلتتىق مۋزەيىنىڭ ديرەكتورى الماز نۇرازحان، وزبەكستانداعى قازاقستاننىڭ توتەنشە جانە وكىلەتتى ەلشىسى دارحان ساتىبالدى، وزبەكستان رەسپۋبليكاسى مادەنيەت ۆيتسە- ءمينيسترى كامول اكيلوۆا، وزبەكستان مەملەكەتتىك ونەر مۋزەيىنىڭ ديرەكتورى ۆاسيلا ساليح قىزى فايزيەۆا قاتىستى.
كورمە اشىلار الدىندا بۇقارالىق اقپارات قۇرالدارى وكىلدەرى ءۇشىن باسپا ءسوز ءماجىلىسى ۇيىمداستىرىلدى. قازاقستان مەن وزبەكستاننىڭ عالىمدارى قاتىستى.
باسپاءسوز ماجىلىسىندە ەكى مەملەكەتتىڭ باس مۋزەيلەرى تۋرالى اقپاراتتار بەرىلىپ، الداعى جوسپارلار تۋرالى ايتىلدى. قازاقستان مەن وزبەكستان اراسىنداعى ىنتىماقتاستىق قارىم- قاتىناستى نىعايتۋ ماقساتىندا مۋزەيلەردىڭ مادەني بايلانىسىنىڭ ماڭىزى تۋرالى جان- جاقتى ءسوز قوزعالدى.
«ۇلى دالا: تاريح جانە مادەنيەت» كورمەسىنىڭ ماقساتى - قازاقستاننىڭ تاريحي- مادەني باي مۇراسىمەن شەتەلدىك كورەرمەندى تانىستىرۋ.
كورمەگە قازاقستان رەسپۋبليكاسىنىڭ سيمۆولى سانالاتىن «التىن ادام» قويىلادى. 1960-جىلداردىڭ سوڭى مەن 1970-جىلداردىڭ باسىندا الماتىنىڭ ماڭايىندا تانىمال ارحەولوگ كەمال اقىشيەۆ زەرتتەپ جۇرگەن ەسىك قورعانىنان، كەيىن قازاقستاننىڭ سيمۆولىنا اينالعان، ساق پاتشاسى - «التىن ادامنىڭ» سۇيەگى تابىلعان ارحەولوگيالىق سەنساتسيا ورىن الدى.
باعا جەتپەس ولجاعا «قازاق تۋتانحامونى» دەگەن ات بەرىلىپ، «عاسىر جاڭالىعى» دەپ تانىلدى. ەجەلگى دالا بيلەۋشىسىنىڭ تاجىندەگى قاناتتى التىن پىراق اشەكەيلەرى قازاقستان رەسپۋبليكاسى ەلتاڭباسىنىڭ بولشەگىنە اينالدى، ال التىن ادامنىڭ ءمۇسىنى الماتىداعى تاۋەلسىزدىك الاڭىنا ورناتىلدى.
كورمەنىڭ اشىلۋ سالتاناتىندا ءسوز العان وزبەكستانداعى قازاقستاننىڭ توتەنشە جانە وكىلەتتى ەلشىسى دارحان ساتىبالدى: «بۇگىنگى كورمەنىڭ ورنى ەرەكشە. بۇل مادەني شارا وزبەكستانداعى قازاقستان جىلىنىڭ سالتاناتتى اشىلۋ قۇرمەتىنە وراي ۇيىمداستىلىپ وتىر. «التىن ادامنىڭ الەم مۋزەيلەرىنە شەرۋى» كورمە جوباسى قازاقستاننىڭ ۇلتتىق قۇندىلىقتارىن، ءتول مادەنيەتى مەن تەرەڭ تاريحىن جاۋھار جادىگەرلەر ارقىلى دۇنيەجۇزىنە تانىتادى. كورمەنىڭ باستى ەكسپوناتى - «التىن ادام» . اتالعان كورمە جوباسى بۇگىنگە دەيىن الەمنىڭ ءتۇرلى ەلدەرىن، وڭتۇستىك كورەيا، پولشا، رەسەي، بەلارۋس، قىتاي مەملەكەتتەرىندە كورسەتىلگەنىن اتاپ ايتقان ءجون» ، - دەدى.
بۇل كورمە جوباسى الەمنىڭ جەتى ەلىن - بەلارۋس، ازەربايجان، رەسەي، قىتاي، پولشا، كورەيا مەملەكەتتەرىن جانە تاتارستان رەسپۋبليكاسىن تابىسپەن ارالاپ، ميلليوننان استام كورەرمەن تاماشالادى. جوبا 2018-2020 -جىلدارعا جوسپارلانعان.
اتالعان كورمە بيىلعى جىلى مالايزيا، يتاليا، تۇركيا جانە گرۋزيا مۋزەيلەرىندە ۇيىمداستىرىلماق. ال 2020 -جىلى اقش، اۆستريا، فرانتسيا، شۆەيتساريا مەن گەرمانيانىڭ باستى مۋزەيلەرىندە وتكىزىلەدى.
وزبەكستان مەملەكەتتىك ونەر مۋزەيىندەگى كورمەگە كيىمى التىن، ال باس كيىمى جەبە، قار بارىسى، ارقار، جىلقى جانە قۇس بەينەسىندەگى التىنمەن اشەكەيلەنگەن التىن ادامنىڭ رەكونسترۋكتسياسى ۇسىنىلىپ وتىر. سونىمەن قاتار اتالعان كورمەدەن ساق جاۋىنگەرىمەن (ارحەولوگتاردىڭ پىكىرلەرى بويىنشا 17-18 جاستار شاماسىندا) بىرگە جەرلەنگەن ەرتە تەمىر عاسىرىنىڭ (ب. د. د V- IV ع ع. ) ارحەولوگيالىق ولجالارىنىڭ كوللەكسياسىن تاماشالاۋعا بولادى.
ق ر ۇلتتىق مۋزەيىنىڭ ديرەكتورى الماز نۇرازحان: «مەن ەڭ الدىمەن قازاقستاندىقتاردى ىستىق ىقىلاسپەن قابىلداعان رەسپۋبليكا باسشىلىعىنا، وسى كورمەگە اتسالىسقان وزبەكستان مەملەكەتتىك ونەر مۋزەيىنىڭ ۇجىمىنا العىس بىلدىرگىم كەلەدى.
«التىن ادامنىڭ الەم مۋزەيلەرىنە شەرۋى» كورمە جوباسى ەلباسى ن. نازاربايەۆتىڭ «رۋحاني جاڭعىرۋ» باعدارلاماسى اياسىندا قولعا الىنعان بولاتىن. قر مادەنيەت جانە سپورت مينيسترلىگىنىڭ قولداۋىمەن بۇگىن، مىنە، جەتىنشى مەملەكەتكە تابان تىرەدىك. كورمەگە «ۇلى دالانىڭ جەتى قىرىندا» اتاپ كورسەتىلگەن ءار سالا بويىنشا قۇندى جادىگەرلەر قويىلدى. وزبەكستاندىقتار بىزگە جات ەمەس، تاريح، مادەنيەت، سالت- ءداستۇر، ءدىني ۇعىمدارىمىز ورتاق قالىپتاسقاندىقتان، بۇگىنگى كورمە سىزدەرگى قىزىقتى بولادى دەپ ويلايمىن» ، - دەدى ءوز سوزىندە.
كورمەگە قازاقستان رەسپۋبليكاسى ۇلتتىق مۋزەيىنىڭ قورلارىنان بارلىعى 127 زات ۇسىنىلدى. كورمەگە ۇسىنىلعان قازاقستاننىڭ ەجەلگى جانە ورتاعاسىرلىق ونەرىنىڭ جاۋھارلارى - بۇل ەۋرازيا دالا مادەنيەتى مۇراسىنىڭ وزىندىك ەرەكشەلىگىن كورسەتەتىن، بۇرىنعى ءداۋىردىڭ ەسىمدەرى بەلگىسىز شەبەرلەرى جاساعان عاجاپ تۋىندىلاردىڭ از عانا بولىگى.