كەكىرىكتەن قالاي قۇتىلۋعا بولادى؟

 نۇر-سۇلتان. قازاقپارات - كوپتەگەن ادامداردى كەكىرىك (تۇسىنىكتى تىلمەن ايتقاندا اسقازانداعى گازدىڭ اۋىز قۋىسىنان شىعۋى) مازالاپ جاتادى.

ال مۇنىڭ سەبەبى كوبىنەسە ادام گازدالعان سۋسىنداردى ءجيى پايدالانعاندىقتان، تاماقتى وتە تەز جەگەندىكتەن، تاماقتانىپ جاتقاندا سويلەپ، تاماقپەن قوسا اۋا جۇتقاننان بولادى. سونىمەن قاتار تاعام تۇرلەرى دە اسەر ەتەدى. ياعني اسبۇرشاق، ۇرمەبۇرشاق، قىرىققابات، ىستىق نان سەكىلدى زاتتاردان دايىندالعان تاعامدار ىشكە جەلدىڭ جينالۋىنا سەبەپكەر. وسى تاعامداردى جەگەن سوڭ ىشتەگى جەلدەر كەيدە اۋىز قۋىسىنان شىعىپ جاتادى. بۇل جاعداي كەيدە كوپشىلىك ورىنداردا ىڭعايسىز جاعدايعا قالدىرىپ جاتادى. نازارلارىڭىزعا كەكىرىكتەن قۇتىلۋدىڭ جولدارىن ۇسىنامىز.

كەكىرۋدىڭ باستى سەبەبى اسقازان مەن وڭەش ورتاسىن ءبولىپ تۇراتىن بۇلشىقەت مەحانيزمىنىڭ بۇزىلىسىنان پايدا بولادى. ەگەر دە ءسىزدى ۇنەمى كەكىرىك مازالاسا، وندا مىندەتتى تۇردە دارىگەرگە كورىنۋ قاجەت. ءجيى قايتالاناتىن بولسا، اسقازان نەمەسە اش ىشەك جولدارىندا اقاۋ بار ەكەندىگىن بىلدىرەدى. ماسەلەن:

اۋىزدا قىشقىل ءدام پايدا بولسا، وندا قىشقىلدىعى جوعارى گاستريت نەمەسە اسقازان جاراسى اۋرۋلارىنان؛

اۋىز قۋىسىنان جەگەن تاعامدار نەمەسە اشى سارعىش سۋ شىقسا، ءوت جولدارىنىڭ دەرتىنەن؛

كەكىرگەندە اۋىز قۋىسىنان اشى قاقىرىق شىعاتىن بولسا، وندا اسقازانداعى قاتەرلى دەرتتەن حابار بەرەدى.

دەرتتەن ايىعۋ ءۇشىن:

1 ستاقان سۋعا 2 شاي قاسىق الما سىركەسۋىن قۇيىپ، تاماقتانعاندا بر جۇتىمنان ىشەدى. 7-10 كۇندە ناتيجەسىن بەرەدى.

100 گرام مۇكجيدەك (كليۋكۆا) شىرىنىنا 100 گرام الوە شىرىنى، 1 شاي قاسىق بال قوسىپ، 200 مل قايناعان سۋعا ارالاستىرادى. مۇنى 1 اپتا بويى كۇنىنە 3 رەت 1 قاسىقتان ءىشىپ وتىرادى. ەمدى 1-ايدان سوڭ قايتا جالعاستىرادى.

ەشكى ءسۇتىن كۇنىنە 3 رەت جارتى ليتردەن ءىشىپ وتىرۋ قاجەت. 3 ايدان سوڭ كەكىرىكتەن مۇلدەم قۇتىلاسىز. كەيدە بۇل مەزگىلدەن دە ەرتە شيپاسى بولۋى مۇمكىن. بۇل ەم ءتۇرى ەڭ ۇلكەن دەگەن كەكىرىكتىڭ ءوزىن جازادى جانە قايتالانبايدى.

ەگەر كەكىرىك اسقازان دەرتىنەن پايدا بولاتىن بولسا، تاماقتان سوڭ سۋعا سودا نەمەسە ماگنەزيادان شاي قاسىقتىڭ ¼ بولىگىن قوسىپ ىشەدى.

 

دەرەككوز: Reactor