نيۋ-يوركتە ديماش قۇدايبەرگەننىڭ شوۋ-كونسەرتى وتەدى
بۇل تۋرالى قازاقپارات تىلشىسىنە بەرگەن سۇحباتىندا مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى، دەپ حابارلايدى قازاقپارات ءتىلشىسى.
قازاقستاندىق مادەنيەت پەن ونەردى تانىتۋدا ديماش قۇدايبەرگەننىڭ وراسان زور جەتىستىكتەرى بارشا حالىقتى قۋانتادى. مينيستر ءبىر سوزىندە ديماشتىڭ جەكە كونسەرتىن ا ق ش قالالارىندا وتكىزۋ تۋرالى ايتىپ قالعان ەدى. بۇل قانشالىقتى مۇمكىن؟ كەلىسسوزدەر باستالدى ما؟ ديماشتىڭ الەمدىك تۋرنە اياسىنداعى كەلەسى كونسەرتى تۋرالى ارىستانبەك مۇحامەدي ۇلى نە ايتادى؟ مادەنيەت جانە سپورت ءمينيسترى وسى سۇراقتارعا جاۋاپ بەردى.
ارىستانبەك مۇحامەدي ۇلى ديماشتىڭ الەمدەگى جانكۇيەرلەرى ارتىپ كەلە جاتقانىن اتاپ ءوتتى.
«ءيا، راسىندا دا ديماش قۇدايبەرگەن الەمدى ءوز ونەرىمەن تامساندىرىپ، تىڭدارمانداردىڭ جۇرەگىن جاۋلاپ الدى. 2018-جىلدىڭ 19- قاراشاسىندا مينيسترلىك لوندوننىڭ «Indigo at the O2» ەڭ ۇلكەن ساحناسىندا ديماشتىڭ جەكە كونسەرتىن ۇيىمداستىردى. سونىمەن قاتار، مادەنيەت جانە سپورت مينيسترلىگى 2019-جىلدىڭ III توقسانىندا نيۋ-يوركتە الەمگە ايگىلى «Madison Square Garden» الاڭىندا ديماش قۇدايبەرگەننىڭ ايرىقشا شوۋ-كونسەرتىن وتكىزبەك. بۇگىنگى تاڭدا اتالعان شوۋدى ۇيىمداستىرۋ جۇمىستارى باستالىپ كەتتى»، - دەيدى مينيستر.
ايتا كەتەيىك، قازاقپارات ءتىلشىسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىمەن تولىق سۇحباتى ەرتەڭ جاريالانادى.