فوتورەپورتاج: الماتىنىڭ كيەلى نىساندارى قايتا جاڭعىردى
اتاپ ايتقاندا، ولكەنىڭ تاريحى مەن مادەنيەتىن كەڭىرەك ناسيحاتتاۋ ماقساتىندا ارحەولوگيالىق، ەتنوگرافيالىق نىسانداردى جاڭعىرتۋعا باسىمدىق بەرىلدى.
الماتىدا رەسپۋبليكالىق ماڭىزى بار 6 كيەلى نىسان بار.
ولاردىڭ قاتارىندا «بورالداي ساق قورعاندارى»، رايىمبەك باتىر ماۆزولەيى، «تاۋەلسىزدىك» مونۋمەنتى «تاۋەلسىزدىك تاڭى»، احمەت بايتۇرسىنوۆ مۇراجاي ءۇيى، ۆوزنەسەنسك كافەدرالى شىركەۋى، بۇرىنعى ۇكىمەت ءۇيى (قازاق بريتان تەحنيكالىق ۋنيۆەرسيتەتىنىڭ عيماراتى).
جەرگىلىكتى ماڭىزى بار كيەلى نىساندار قاتارىندا مەدەۋ مۇز ايدىنى، كوكتوبە، شىمبۇلاق، بۇرىنعى ۆەرنىي بالالار ءۇيىنىڭ عيماراتى (قازىرگى الماتى مۋزەيى)، 1931-1933 -جىلدارداعى اشتىق قۇرباندارى ەسكەرتكىشى، ق ر عىلىم ورداسى، ورتالىق زيرات جانە كەڭساي، مۇحتار اۋەزوۆتىڭ، دىنمۇحاممەد قونايەۆتىڭ مۋزەي- ءۇيى بار.
2017 -جىلى رايىمبەك باتىر ماۆزولەيىندە عىلىمي رەستاۆراتسيالىق جۇمىستار جۇزەگە اسىرىلدى. بۇدان بولەك ماۆزولەيدىڭ قاسىنا مەموريالدى مۋزەي كەشەنى، مۋزەي، مەشىت سالىنادى. اۋماقتى گەولوگيالىق زەرتتەۋ جۇمىستارى جۇرگىزىلدى. جوبانى جۇزەگە اسىرۋدىڭ ساۋلەت جوسپارلاۋ تاپسىرىسى الىندى. ەسكيزدىك جوبا بەكىتىلدى. قازىر جوبالىق- سمەتالىق قۇجاتتاما جاسالىپ جاتىر.
2018 -جىلى بورالداي ساق قورعانى تەرريتورياسىندا پارك قۇرىلدى. مۇندا ساق داۋىرىندە بولعان ادامدى جەرلەۋ راسىمدەرىنەن سىر شەرتەتىن قورعان، ساق تۇرعىن جايىنىڭ ماكەتى كورسەتىلگەن. وسى بورالداي ساق قورعاندارىن ساقتاپ، دامىتۋ ماقساتىندا، يۋنەسكو مۇرالارىنىڭ تىزىمىنە الىنۋ جانە تۋريستەردى تارتۋ ءۇشىن 430 گەكتار اۋماقتا ساق مادەنيەتىنىڭ ورتالىعى اشىلادى. مۇندا رەستاۆراتسيالىق شەبەرحانا، كونفەرەنسيا جانە مۋلتيمەديا زالدارى پايدا بولادى.
ودان بولەك ۆوزنەسەنسك شىركەۋى تولىق رەستاۆراتسيادان وتكىزىلدى. وسى ماقساتتا دەمەۋشىلەر 504 ميلليون تەڭگە كولەمىندە قارجى ءبولدى.
نىساننىڭ سىرتقى كەلبەتى جاڭارىپ قانا قويماي، ىشكى كەلبەتى، قابىرعالارى قايتا بويالدى. اينالاسى اباتتاندىرىلىپ، كوگالداندىرىلدى.
قالانىڭ تۋريستىك تارتىمدىلىعىن ارتتىرۋ ماقساتىندا VisitAlmaty تۋريستىك ورتالىعى اشىلدى. بۇل ورتالىق 1904 -جىلى سالىنعان (بۇرىنعى شىركەۋ ءۇيى) عيماراتتا ورنالاسقان.
اۆتور: گۇلميرا عوسمانالي