ديماش رەسەي حالىق ءارتىسى اللا پۋگاچيەۆانىڭ كەشىندە ءان ايتتى

نۇر-سۇلتان. قازاقپارات - ديماش قۇدايبەرگەن رەسەيدىڭ حالىق ءارتىسى، ءانشى اللا پۋگاچيەۆانىڭ مەرەكەلىك كەشىندە ءان ايتتى، دەپ حابارلايدى قازاقپارات ءتىلشىسى.

«قۇرمەتتى دوستار! ديماش قۇدايبەرگەننىڭ بۇگىن، 08:04  دە اللا بوريس قىزى پۋگاچيەۆانىڭ مەرەكەلىك كەشىندە ونەر كورسەتۋى. «تۇسكە ۇقساس ماحاببات» كومپوزيتسياسى، يگور كرۋتويدىڭ اككومپانەمەنتى»، - دەپ جازىلعان قازاقستاندىق ءانشىنىڭ ۆكونتاكتە الەۋمەتتىك جەلىسىندەگى رەسمي پاراقشاسىندا.

ولەڭ اياقتالعاننان كەيىن زالداعى كورەرمەندەر «براۆو!» دەپ دۋ-قول شاپالاق سوعىپ، ديماشتىڭ ەسىمىن بىرنەشە قايتارا ايعايلادى. ساحناعا ۇمتىلعان حالىق قولدارىنداعى گۇلدەردىڭ بارلىعىن ديماشقا سىيلادى. كەش جۇرگىزۋشىسى شوۋمەن ماكسيم گالكين: «يگور كرۋتويدىڭ تاماشا ءانى جانە ديماش قۇدايبەرگەننىڭ تاڭعاجايىپ داۋىسى. تاماشا تاندەم. بۇل سىزدەرگە ارنالعان قوشەمەت»، - دەدى.

ديماش 8- ءساۋىر كۇنى ماسكەۋدەگى كروكۋس سيتي حول عيماراتىندا رەسەيلىك ءانشىنىڭ 70 جىلدىق مەرەيتويىنا ارنالعان «اللاعا ارنالعان سىيلىق» كونسەرتىندە ونەر كورسەتەتىنى تۋرالى بۇعان دەيىن جازعان بولاتىنبىز.

وعان گريگوري لەپس، سەرگەي شنۋروۆ، سۆەتلانا لوبودا، ۆالەري لەونتيەۆ سىندى تانىمال جۇلدىزدار قاتىساتىنى حابارلانعان ەدى.

اللا پۋگاچيەۆا - كەڭەس وداعىنىڭ جانە رەسەيدىڭ ەسترادا ءانشىسى، كومپوزيتور، تەلەجۇرگىزۋشى جانە اكتريسا. ك س ر و حالىق ءارتىسى (1991)، ر ف مەملەكەتتىك سىيلىعىنىڭ لاۋرەاتى (1995). ونىڭ رەپەرتۋارىندا ورىس، اعىلشىن، فرانسۋز، نەمىس، ۋكراين تىلدەرىندە 500 گە جۋىق ءان بار.

ايتا كەتەيىك، ديماش قۇدايبەرگەننىڭ 22- جانە 23- ناۋرىز كۇندەرى كرەمل سارايىندا وتكەن كونسەرتتەرى انشلاگ جينادى. ديماشتىڭ ونەرىن تاماشالاۋعا الەمنىڭ 50 دەن استام ەلىنەن جانكۇيەر كەلدى.

ال 29- ماۋسىم كۇنى ديماش نۇر-سۇلتان قالاسىندا شىعارماشىلىق كەشىن وتكىزەدى.