رەسەي پرەزيدەنتى مامىر ايىندا نۇر-سۇلتانعا كەلەدى

ماسكەۋ. قازاقپارات - قازاقستان مەن رەسەي پرەزيدەنتتەرىنىڭ رەسمي كەزدەسۋىنىڭ قورىتىندىسى بويىنشا جۋرناليستەرمەن باسپا ءسوز ءماسليحاتىن وتكىزگەن ۆلاديمير پۋتين جوعارى ەۋرازيالىق ەكونوميكالىق قاۋىمداستىعىنىڭ ماجىلىسىنە قاتىساتىنىن ايتتى.

اتالمىش شارا 29- مامىردا نۇر-سۇلتاندا وتەدى، دەپ حابارلايدى «قازاقپارات» ح ا ا- ءنىڭ مەنشىكتى ءتىلشىسى.

«قازاقستان پرەزيدەنتى توقايەۆپەن ءبىز جۋىردا تاعى كەزدەسەمىز. 29- مامىردا نۇر-سۇلتاندا جوعارى ەۋرازيالىق ەكونوميكالىق قاۋىمداستىعىنىڭ ءماجىلىسى وتەدى. بۇل جيىن وسى ۇيىمنىڭ 5 جىلدىعىنا قاراي ۇيىمداستىرىلعالى وتىر»، - دەدى ۆ. پۋتين.

رەسەي باسشىسى سونداي-اق سوزىندە 5 جىلدىق مەرەكەگە بايلانىستى وتكىزىلگەلى وتىرعان جيىننىڭ ەۋرازەق- ءتى بەكىتۋ تۋرالى كەلىسىمگە قول قويىلعان قازاقستان استاناسىندا ۇيىمداستىرىلۋى جاقسىلىقتىڭ نىشانى ەكەنىن اتاپ ءوتتى.

«وسىلايشا، ءبىز وداقتى قۇرۋعا ۇسىنىس جاساپ، ەۋرازيالىق ىقپالداستىق جوباسىنىڭ نەگىزىن قالاۋدا ماڭىزدى ءرول اتقارعان نۇرسۇلتان ءابىش ۇلى نازاربايەۆتىڭ ەڭبەگىنە نازار اۋدارعىمىز كەلەدى»، - دەدى رەسەي پرەزيدەنتى.