ماسكەۋدە «جىلقىنىڭ تاريحى» تريلوگياسى تانىستىرىلدى
فيلمدى «رۋحاني جاڭعىرۋ» باعدارلاماسى جانە ەلباسىنىڭ «ۇلى دالانىڭ جەتى قىرى» ماقالاسىنداعى تاپسىرمالاردى جۇزەگە اسىرۋ ماقساتىندا قازاقستاننىڭ تۇركىستان قالاسىنان باعىت العان «The Great Steppe Project» حالىقارالىق اۆتوجارىس قاتىسۋشىلارى ۇسىندى. حالىقارالىق شارا ەۋروپانىڭ 26 ەلىنە ساپارلايتىنى جوسپارلانعان.
دەرەكتى فيلم عىلىمي زەرتتەۋ جۇمىستارى مەن زاماناۋي اقپاراتتىق تەحنولوگيالارعا نەگىزدەلگەن. وندا جىلقىنى قولعا ۇيرەتۋمەن اينالىسقان قازاقستان اۋماعىنداعى ەجەلگى مادەنيەتتەردىڭ كەزەڭدەرى قايتا جاڭعىرتىلعان. بۇل ۇدەرىس ادامزات كوممۋنيكاتسياسىنا قاتىستى جاڭا جۇيەنىڭ قالىپتاسۋىن ايقىنداپ، كوشى-قوننىڭ جاندانۋىنا جانە ەجەلگى مەملەكەتتەردىڭ پايدا بولۋىنا جول اشتى.
جوبا كانادا مەن قازاقستان پروديۋسەرلەرىنىڭ حالىقارالىق ىنتىماقتاستىق بايلانىسىنىڭ جەمىسى. فيلمدى رەجيسسەر، انتروپولوگ نايوبي تومپسون مەن قازاقستاندىق پروديۋسەر، زەرتتەۋشى نۇربول بايمۇحانوۆ جەتەكشىلىك ەتكەن كانادالىق ءتۇسىرۋ توبى ەلىمىزدىڭ اۋماعىندا تۇسىرگەن. وعان وتاندىق سۋرەتشىلەردەن، ارتىستەردەن، كاسكادەرلەردەن، دۋبلەرلەر مەن بەزەندىرۋشىلەردەن قۇرالعان شىعارماشىلىق توپ جۇمىلدىرىلعان.
«كارتينادا جىلقىلار العاش رەت قازاقستان جەرىندە قولعا ۇيرەتىلگەنى باياندالادى. مۇنىڭ نەگىزگى دالەلدەرىنىڭ ءبىرى - الەمنىڭ جەتەكشى عالىم-ساراپشىلارىنىڭ گەنەتيكالىق زەرتتەۋلەرىنەن وتكەن د ن ق ناتيجەسى. ول - «بوتاي» قونىسىنداعى قازبا جۇمىستارى بارىسىندا تابىلعان ارتەفاكت ارقاسىندا الىنعان سىناما. مۇنىڭ ءبارى ءبىزدىڭ اتا-بابالارىمىزدىڭ كۇللى ادامزاتتىڭ دامۋىنا، جاڭا ەتنيكالىق توپتار مەن ەرتە مەملەكەتتەردىڭ پايدا بولۋىنا ۇلكەن تاريحي ۇلەس قوسقانىن ايعاقتايدى. اتالعان دەرەك تۇڭعىش پرەزيدەنتىمىزدىڭ «ۇلى دالانىڭ جەتى قىرى» ماقالاسىندا دا ايتىلعان»، - دەدى كارتينانىڭ پروديۋسەرى.
«Equus: جىلقىنىڭ تاريحى» كارتيناسىنىڭ ءتۇسىرىلىمى 3 جىل بويى 11 ەلدە ءتۇسىرىلدى. قازاقستاندا ءتۇسىرىلىم الماتى جانە اقمولا وبلىستارىنىڭ اۋماعىندا جۇرگىزىلدى. قازىرگى ۋاقىتتا فيلم قازاقستان، ا ق ش جانە كانادا حالقىنىڭ نازارىنا ۇسىنىلىپ ۇلگەردى»، - دەدى ن. بايمۇحانوۆ.
قازاقستان اۋماعىنداعى « Equusجوباسىنىڭ تۇسىرىلىمىنە تاريحشى كەڭەسشىلەر، سۋرەتشىلەر، اكتەرلەر، قۇرىلىسشىلار، دەكوراتورلار، ونەر جانە كوستيۋم ديزاينى سالاسىنداعى ماماندار جۇمىلدىرىلدى. سونىمەن قاتار، تۇسىرىلىمگە 1500 دەن استام جىلقى قاتىستىرىلدى.
«ماسكەۋ - اۆتوموبيل جارىسىنىڭ العاشقى ايالداماسى رەتىندە الىندى. ودان كەيىن مينسك، ۆيلنيۋس، حەلسينكي، ستوكگولم، وسلو، بريۋسسەل، پاريج، لوندون، مادريد، جەنيەۆا، بەرن، ريم، ۆەنا جانە باسقا دا قالالار بار»، - دەدى ن. بايمۇحانوۆ.
الداعى ۋاقىتتا تۇساۋكەسەردى گەتەبورگ، گااگا، بۋداپەشت، پراگا، بەرلين، ۆارشاۆا، بۋحارەست، سوفيا، افينا، ىستانبۇل، انكارا، تبيليسي جانە باكۋدە وتكىزۋ كۇتىلەدى. جالپى دەرەكتى تريلوگيا 2019-جىلعى ناۋرىزدا 50 ەل، ونىڭ ىشىندە كانادا، ا ق ش، گەرمانيا، فرانسيا مەن دانيانىڭ جانە قازاقستاننىڭ تەلەارنالارىندا كورسەتىلەدى دەپ جوسپارلانعان.
«The Great Steppe Project» اۆتوجارىسى ق ر سىرتقى ىستەر مينيسترلىگىنىڭ قولعابىس ەتۋىمەن ۇيىمداستىرىلدى. ماقساتى - حالىقارالىق اۋديتورياعا قازاقستاننىڭ يميدجىن ناسيحاتتاۋ، ەلىمىزدىڭ تۋريستىك جانە ينۆەستيتسيالىق الەۋەتىن العا جىلجىتۋ، عىلىمي نەگىزدە دالەلدەنگەن - جىلقىنى قولعا ۇيرەتۋ ءۇردىسى قازاقستان جەرىندە جۇزەگە اسىرىلعانىن الەم جۇرتشىلىعىنا پاش ەتۋ.
«فيلم تاماشا تۇسىرىلگەن، وتكەنگە كەرەمەت ساياحات جاسادىق. اتا- بابالارىمىزدىڭ ومىرىنە ەنگەندەي بولدىق. اۋقىمدىلىعى مەن كولەمى تۇرعىسىنان «ادامزاتتىڭ ۇلى وديسسەيى» فيلمىمەن سالىستىرۋعا بولادى. جىلقىنىڭ ەڭ العاش قازاقستان جەرىندە قولعا ۇيرەتىلگەنىن كارتينا ءسوزسىز دالەلدەپ بەردى»، - دەدى ماسكەۋ تۇرعىنى اندرەي ستريگۋنەنكو.
ايتا كەتەيىك، «Equus: جىلقىنىڭ تاريحى» دەرەكتى تريلوگيانىڭ ەكىنشى ءبولىمى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆقا 25- قاڭتار كۇنى تانىستىرىلعان بولاتىن.