بۇدان بولەك اتاقتى جۇلدىزداردىڭ ەسىمىن دە رۇقساتسىز پايدالانۋعا تىيىم سالىنعان. قىتايدىڭ اۆتورلىق قۇقىق جونىندەگى مەملەكەتتىك باسقارماسى كينوتەاترلاردا فيلمدەردى زاڭسىز كوشىرگەندەردى جاۋاپقا تارتىپ جاتىر. پيراتتىق كوشىرمەلەردى ساتاتىن ونلاين- پلاتفورمالاردى دا تەكسەرۋگە كىرىسكەن.
قىتايدىڭ اۆتورلىق قۇقىق جونىندەگى مەملەكەتتىك باسقارماسى تەك ءبىر ايدىڭ ىشىندە عانا پيراتتىق فيلمدەردىڭ 7,7 مىڭ سىلتەمەسىن جويعان. ۇرلانعان ءونىمدى سايتقا شىعاراتىندار شەتەلدىك سەرۆەرلەردى پايدالانادى. سوندىقتان ينتەرنەت جەلىسىندەگى زاڭسىزدىقپەن كۇرەسۋ وڭاي ەمەس. سايتتار، موبيلدىك قوسىمشالار، WeChat اككاۋنتتارى مەن ەلەكتروندى ساۋدا الاڭدارىنا دا تەكسەرۋ جۇرگىزىلىپ وتىرادى. اۆتورلىق قۇقىقتى ورەسكەل بۇزعانداردىڭ ۇستىنەن قىلمىستىق ءىس قوزعالادى.
جالپى، قىتايدا ۇزاق ۋاقىتتان بەرى زياتكەرلىك مەنشىك سالاسى قورعالماي كەلدى. ەتى ءتىرى بيزنەسمەندەر كەزىندە الەمگە تانىمال برەندتەردىڭ ءبارىن ءوز اتىنا جازىپ العان. ال ونىڭ زاڭدى يەلەرى ءوز مۇددەسىن بەيجىڭ جوعارعى حالىقتىق سوتىندا داۋلاعان بولاتىن. ماسەلەن، ايگىلى باسكەتبولشى مايكل دجوردان ءوز ەسىمىن قورعاپ ءتورت جىل سوتتاسقان. سپورتشى ءوزىنىڭ ەكى يەروگليفتەن تۇراتىن تسياودان ەسىمىن پايدالانىپ، سپورتتىق كيىم ساۋدالاعان كومپانيامەن سوتتاسىپ، جەڭىسكە جەتكەن بولاتىن. قازىر الەمنىڭ ەكىنشى ەكونوميكاسى ءۇشىن زاڭدى قاتايتىپ، سەنىمگە يە بولۋ ماڭىزدى بولىپ وتىر.
ليۋ ين، قىتاي حالىق ۋنيۆەرسيتەتى قارجىلىق زەرتتەۋ ينستيتۋتىنىڭ ساراپشىسى:
- قىتاي اۆتورلىق قۇقىقتى قورعاۋعا ەرەكشە نازار اۋدارىپ وتىر. تاياۋدا عانا Land Rover- ءدىڭ سوتتا جەڭىپ شىعۋى سوعان دالەل. سوڭعى 17 جىلدا گۋاڭدۇڭ پروۆينتسياسىندا ءوزىنىڭ اۆتورلىعىن قورعاعان شەت ەلدىكتەر ءۇشىن تابىستى بولعانىن كورەمىز. نارىقتىق ەكونوميكانىڭ دامۋ بارىسىندا مۇنداي پروبلەمالاردىڭ كەزدەسۋى تاڭسىق ەمەس. اسىرەسە اۆتوموبيلدەردىڭ ديزايندارى ءبىرىن- ءبىرى قايتالاعانداي بولىپ جاتادى.
بريتاندىق اۆتووندىرۋشىگە قىتايداعى قۇقىعىن قورعاۋ ءۇشىن ءۇش جىل ۋاقىت كەتتى. Jaguar Land Rover ءوزىنىڭ قىتايلىق كوشىرمەسىن جاساعان كومپانيانى سوتقا بەرىپ، اقىرى جەڭىپ شىقتى. بەيجىڭ سوتى بريتاندىق كولىككە ءتان بىرنەشە قىرىن كوشىرگەن قىتايلىق اۆتوءوندىرۋشى تۇتىنۋشىلاردى شاتاستىرادى دەپ شەشىم شىعارعان.
جالپى، بىرنەشە جىلدان بەرى قىتايدا تانىمال ادامداردىڭ ەسىمىمەن اتالاتىن ساۋدا بەلگىلەرىن تىركەتۋگە دە تىيىم سالىنعان. بۇعان قاتىستى داۋ- داماي جيىلەپ كەتكەندىكتەن جوعارعى سوت برەندتىڭ تانىمال تۇلعانىڭ اتىمەن اتالۋى ساتىپ الۋشىلاردى اداستىرادى، ال بۇل قوعامعا زيان كەلتىرەدى دەگەن قاۋلى شىعاردى.
اۆتورلارى: نۇربەك بەكەن، جاڭ ءسۇي
www.24.kz