ەۋروپالىق وداق قازاقستاندىق جۋرناليستەر اراسىندا بايقاۋ جاريالادى
«قازاقستانداعى ەۋروپالىق وداق وكىلدىگى ق ر اقپارات جانە قوعامدىق دامۋ مينيسترلىگىنىڭ قولداۋىمەن ب ا ق سالاسىنداعى بىلىكتىلىكتى ارتتىرۋ ورتالىعىمەن بىرلەسىپ، قازاقستاندىق جۋرناليستەرگە ارنالعان «ەۋرووداق - قازاقستان: مەديا ارىپتەستىكتى نىعايتۋ جولىندا» اتتى كاسىبي حالىقارالىق تاعىلىمداماعا بايقاۋ جاريالايدى. بايقاۋ ەۋروپالىق وداق پەن قازاقستان رەسپۋبليكاسى اراسىنداعى قاتىناستاردى كەڭەيتۋگە ءارى نىعايتۋعا، اشىق ديالوگ قالىپتاستىرۋعا جانە قازاقستان مەديا قاۋىمداستىعىندا ەۋروپالىق وداق تۋرالى حاباردارلىقتى جەتىلدىرۋگە باعىتتالعان»، - دەلىنگەن تاراتىلعان اقپاراتتا.
بايقاۋ ناتيجەسىندە ەو ينستيتۋتتارى (ەۋروپالىق پارلامەنت، ەو كەڭەسى، ەۋروپالىق كوميسسيا، ەۋروپالىق سىرتقى ىستەر قىزمەتى) مەن بريۋسسەلدە مەديا پۋلدى زەردەلەۋ ءۇشىن ءبىر اپتالىق تانىستىرۋ تاعىلىمداماعا قاتىسۋعا 4 جەڭىمپاز ىرىكتەلەتىن بولادى. سونىمەن قاتار جەڭىمپازدار ەۋروپالىق كوميسسيانىڭ كۇندەلىكتى بريفينگتەرىنە قاتىسا الادى جانە ءىشىنارا ە و ينستيتۋتتارىنىڭ جۇمىس تەتىكتەرىمەن تانىسادى.
سونداي-اق، جەڭىمپازدار قىرعىز رەسپۋبليكاسىنىڭ بىشكەك قالاسىندا وتەتىن ەۋروپالىق وداق-ورتالىق ازيا مينيسترلىك باسقوسۋعا جولداما الادى. بايقاۋعا 2019-جىلعى 25- ساۋىرگە دەيىن وتىنىمدەر قابىلدانادى. تالاپكەر تولتىرىلعان ءوتىنىمدى قوسىمشا فايلدارمەن جانە وعان سىلتەمەلەرمەن قوسا جولدايدى. بىلىكتى قازىلار القاسى مەن ۇيىمداستىرۋشى كوميتەتتىڭ تالاپكەرلەردى انىقتاۋى، تاعىلىمداماعا قويىلاتىن تالاپتارعا سايكەس 2019-جىلعى 10- مامىرعا دەيىن ستيپەنديالاردى تاعايىنداۋى جۇرگىزىلەدى.
وسىدان كەيىن جەڭىمپازداردى بەكىتىلگەن باعدارلاما بويىنشا 2019-جىلعى ماۋسىمنىڭ اياعىنا دەيىن تاعلىمداماعا جىبەرىلەدى. تاعىلىمدامانىڭ ۇزاقتىعى جولدى قوسا ەسەپتەگەندە - 1 اپتا.