قايىق سپورتىندا قازاقستان جانە وزبەكستان سپورتشىلارى دا باق سىناۋدا.
«بۇل جارىسقا ءبىر جىلعا جۋىق دايىندالدىق. كۋبوكتى ءدال وسى شارداراداعى سۋ قويمادا وتكىزۋ تۋرالى باستامانى وبلىستىق قاۋىمداستىق كوتەرگەن بولاتىن. ماقساتىمىز - جەلكەندى قايىق سپورتىن دامىتىپ، مىقتى سپورتشىلار دايىنداپ شىعارۋ. نەگىزىنەن ءبىزدىڭ وبلىستا سپورتتىڭ وسى ءتۇرىن دامىتۋ ءۇشىن ءدال وسى شاردارا سۋ قويماسى تاپتىرماس ورىن. كليماتى جاعىنان دا ىڭعايلى»، - دەدى تۇركىستان وبلىستىق ەسكەك ەسۋ جانە جەلكەندى قايىق سپورتى اسسوتسياتسياسىنىڭ ءتوراعاسى، قازاقستاننىڭ ەڭبەك سىڭىرگەن جاتتىقتىرۋشىسى دەنيس جارمەنوۆ.
وبلىستا العاش رەت وتكىزىلىپ وتىرعان دودادا 100 گە جۋىق سپورتشى ءوزارا بەسەكەلەسۋدە. اتاپ ايتقاندا، تۇركىستان، قاراعاندى، الماتى وبلىستارى مەن وزبەكستان قۇراماسىنىڭ سپورتشىلارى كۋبوككە تالاسپاق.
«مەنىڭ جەلكەندى قايىق سپورتىمەن اينالىسىپ جاتقانىما كوپ بولا قويمادى، نەبارى ءبىر-اق جىل. ءبىراق وسى ءبىر جىل ىشىندە ءتۇرلى دارەجەدەگى التى مەدالدى ەنشىلەپ ۇلگەردىم. قازاقستان قۇراماسىنىڭ سپورتشىسىمىن ءارى ەل چەمپيونى دەگەن اتاعىم بار. نەگىزىنەن، كوپشىلىك بۇل سپورت ءتۇرى قىز بالاسى ءۇشىن اۋىرلاۋ ەكەنىن ايتادى. مەنىڭشە، كەز كەلگەن سپورتتىڭ ءوز قيىنشىلىعى مەن قىزىقتى تۇستارى بولادى. ءيا، العاشىندا مەنىڭ دە قايىقتى يگەرە الماي، ءبىراز قينالعانىم بار. ءبىراق تەر توگە جاساعان جاتتىعۋدىڭ ارقاسىندا قايىقتى يگەرۋدىڭ قىر-سىرىن ۇيرەندىم. بۇل كۋبوكتە وزىمە ءبىرىنشى ورىن الۋ كەرەك دەگەن ماقسات قويىپ وتىرمىن. باعىما قاراي كورەرمىن»، - دەدى جاس سپورتشى ادەلينا رەچكو.
سونىمەن قاتار، ادەلينا شاردارا سۋ قويماسىنان وقۋ-جاتتىعۋ جۇمىستارىن جاسايتىن بازا سالىنسا، جىل بويىنا دايىندىق ۇزىلمەس ەدى دەگەن تىلەگىن دە جاسىرمادى.
قايىقتار جارىسى 30- ناۋرىز كۇنى ءوز مارەسىنە جەتەدى.