قۇرساق شاشۋ سالتى

 نۇر-سۇلتان. قازاقپارات - ءامينا انامىزدىڭ بويىنا بالا بىتكەندە مۇحامبەت پايعامباردىڭ نۇرى اناسىنىڭ جاتىرىنا اۋىسادى.

نۇردىڭ شاپاعىنان ءامينا انامىزدىڭ ديدارى نۇرلانىپ سالا بەرەدى. سىر-سىمباتى بۇرىنعىدان دا اجارلانىپ، كوركى كەمەلىنەن اسىپتى. ەل اراسىندا «نۇر ديدارلى»، «ەڭ ادەمى ايەل - اياعى اۋىر ايەل»، «جۇكتى ايەلدىڭ جۇزىنەن نۇر ەسەدى» دەگەن سوزدەر وسىعان وراي ايتىلىتتى دەسەدى. ءامينا انامىزدىڭ نۇر جامالىنا ىنتىق بولعان پەرىشتەلەر ونى ديدارىنا قاراۋ ءۇشىن اسپان الەمىنەن اعىلىپ كەلەدى ەكەن. ۇلىق اللا پەرىشتەلەرگە:

- دۇنيەگە مەنىڭ سۇيىكتى دوسىم كەلەدى. ءجانناتتىڭ ءدۇر گاۋھارلارى مەن ءىنجۋ-مارجاندارىن ءاميناعا شاشىڭدار. شاشۋلار ونىڭ جۇرەگىندەگى مەيىرىممەن ماحابباتتىڭ شەكسىز قاينار كوزىن اشادى. ءامينانىڭ قۋانىشىنا ورتاق بولعان جاندارعا مەنىن راحمەت نۇرىم جاۋادى. اياعى اۋىر كەلىنشەكتىڭ نيەتتەس جاقىندارى نەعۇرلىم كوپ بولسا، ۇرپاعىنىڭ دا ادال دوستارى سوعۇرلىم كوپ بولادى، - دەيدى.

بۇنى ەستىگەن پەرىشتەلەر، ۇرلەر مەن عيلماندار جارىسا بارىپ، پايعامباردىڭ اناسىنا شاشۋ شاشادى. پەيىشتى جەمىس- جيدەكتەرىمەن ءامينا انامىزدىڭ جەرىگىن باسىپ، كاۋسار بۇلاعىنىڭ سۋىمەن ءشولىن قاندىرادى.

اراسىندا قۇرساق شاشۋ دەگەن ءداستۇر وسىعان وراي شىقسا كەرەك. ايەلدىڭ بويىنا بالا بىتكەنىن ەستىگەن جۇرت ونىڭ شاڭىراعىنا كەلىپ، شاشۋ شاشىپ، اق تىلەك ايتاتىن بولعان. كورشى كەلىنشەكتەر مەن اقجۇرەك قۇربىلارى جانە تاتۋ ابىسىندارى ونىن جەرىگىن باسۋ ءۇشىن ءار ءتۇرلى ءتاتتى، ءدامدى اساۋقاتتار ءپىسىرىپ ۇيىنە بارادى. ەنەلەرى «كەلىندى اتا-بابا ارۋاعى قولداپ ءجۇرسىن» دەپ ءۇيىنىڭ وڭ جاق كەرەگەسىنە اق ورامال بايلايدى.

قۇرساق شاشۋ ءداستۇرى «الپامىس باتىر» جىرىندا دا باياندالعان. باي ءبورى مەن انالىق بارلىق اۋليەنى قىدىرىپ، ەتەگىن شەڭگەل سىدىرىپ ءجۇرىپ قۇدايدان بالا تىلەيدى. باباتۇكتى شاشتى ءازىز اۋليەنىڭ باسىنا تۇنەگەن ءتۇنى تىلەگى قابىل بولىپ، بايبىشەنىڭ قۇرساعىنا بالا بىتەدى. وسى جاڭالىقتى ەستىگەن ەل-جۇرتى جينالىپ، قۇرساق شاشۋ شاشادى. اقسەلەۋ سەيدىمبەك ۇلىنىڭ شالقىما ۇلگىسىمەن بايانداعان «الپامىس باتىر» جىرىندا:

«...جاقسى نىشاندى كوزدەرى كورىپ، كوڭىلى ورنىققان ەل-جۇرتى سول جەردە قۇتتى بولسىن ايتىسىپ، باي ءبورىنىڭ توبەدەي اق ورداسىنىڭ تورىنە جەتكىزە قۇرساق شاشۋ شاشتى»، - دەپ سۋرەتتەيدى.

«الپامىس باتىر» جىرىنىڭ سۇلتانقۇل اققوجايەۆ جىرلاعان نۇسقاسىندا:

- ءار جەردەن حالقى كەلدى دە، «قۇتتى بولسىن!» - دەدى دە،

قۋرساق شاشۋ جەدى دە،

قايتادان حالقى تاراعان»، - دەگەن جىر جولدارى بار.

قازاقستاننىڭ باسىم بولىگىندە بۇل ءداستۇر كۇنى بۇگىنگە دەيىن جالعاسىن تاۋىپ كەلە جاتىر. ماحابباتپەن، ادال دوستىقپەن ماعىنالى ءومىر سۇرەمىن دەگەن ادامعا بۇل سالت - تاپتىرمايتىن تاربيە قۇرالى.