ەلورداداعى جول اپاتى: مەرت بولعانداردىڭ وتباسىنا ماتەريالدىق كومەك بەرىلەدى
ونىڭ ايتۋىنشا، جۇرگىزۋشى اباي وسپانوۆ تاڭعى 6.30-دا رەيسكە شىعاردا مەديتسينالىق تەكسەرۋدەن وتكەن جانە دەنساۋلىعىنان ەش كىنارات بايقالماعان.
«سونىمەن بىرگە، جۇرگىزۋشى 2018 -جىلى جەلتوقسان ايىنىڭ سوڭىندا دا مەديتسينالىق تەكسەرۋدەن وتكەن. دەنساۋلىعى جاقسى بولعان. ۇجىمدا ۇلگىلى قىزمەتكەر بولعان. 2018 -جىلى ەشقانداي جول ءتارتىبىن بۇزباعان. قوعامدىق كولىك تە جوسپارلى تەحنيكالىق تەكسەرۋدەن وتكەن، اقاۋ بولماعان. اپاتتىڭ ناقتى سەبەپتەرى سوت-مەديتسينالىق ساراپتاما ناتيجەسىندە انىقتالادى. ول ءۇشىن ارنايى كوميسسيا قۇرىلدى»، - دەدى ب. يگەنبەردينوۆ استانا اكىمدىگىندە وتكەن باسپا ءسوز ءماسليحاتىندا.
جۇرگىزۋشىنىڭ ارتىندا ءتورت بالاسى قالدى، ولاردىڭ ەڭ ۇلكەنى - 17 جاستا.
«اپاتتا كوز جۇمعانداردىڭ تۋىستارىنا بارلىق ماتەريالدىق كومەك كورسەتىلەدى. سونىمەن بىرگە، جولاۋشى ايزات نۇركەنوۆانىڭ قاراعاندى وبلىسىندا تۋعانى انىقتالدى. ونىڭ دەنەسىن قاراعاندىعا جەتكىزۋگە كومەك بەرىلەدى. ا. نۇركەنوۆانىڭ ارتىندا ءبىر بالاسى قالدى»، - دەدى ب. يگەنبەردينوۆ.
ەسكە سالا كەتسەك، ەلورداداعى جانتۇرشىگەرلىك كولىك اپاتىنان زارداپ شەككەندەر سانى 27 گە جەتتى. سوڭعى مالىمەتكە سايكەس، زارداپ شەككەندەر سانى 36 ادامعا جەتتى.
26 -ناۋرىز كۇنى ۇلى دالا مەن قابانباي باتىر داڭعىلى قيىلىسىندا ءۇش اۆتوبۋستىڭ جانە جەڭىل كولىكتەردىڭ قاقتىعىسۋىمەن جول- كولىك وقيعاسى ورىن الدى. قالا ماڭى باعدارىنداعى № 303 -اۆتوبۋس № 12 -باعدارداعى جولاۋشىلار اۆتوبۋسىمەن سوقتىعىستى. وسىنىڭ ەكپىنىمەن ولار № 53 -اۆتوبۋسقا جانە جەدەل جاردەم كولىگىنە بارىپ سوعىلدى.