ەلوردادا دومبىرا ەسكەرتكىشىنە بايقاۋ جاريالاندى
ەڭ ۇزدىك جۇمىس قر ۇلتتىق اكادەميالىق كىتاپحاناسىنىڭ الدىندا ورناتىلادى.
«ەلباسى ن. ءا. نازاربايەۆتىڭ «رۋحاني جاڭعىرۋ: بولاشاققا باعدار» جانە «ۇلى دالانىڭ جەتى قىرى» اتتى باعدارلامالىق ماقالالار اياسىندا، 2018-جىلى ەلباسى شەشىمىمەن شىلدەنىڭ ءبىرىنشى جەكسەنبىسى ۇلتتىق دومبىرا كۇنى بولىپ جاريالانعان ەدى. اتالعان باستامانى جۇزەگە اسىرۋ ماقساتىندا ق ر ۇلتتىق اكادەميالىق كىتاپحاناسى قازاق حالقىنىڭ مۋزىكالىق مادەنيەتىنىڭ باستى سيمۆولى ءارى ۇلى اسپابى - دومبىرا ەسكەرتكىشى كومپوزيتسياسىنا بايقاۋ جاريالايدى»، - دەلىنگەن ۇلتتىق كىتاپحانا حابارلاماسىندا.
بايقاۋعا قازاقستان رەسپۋبليكاسىنىڭ سۋرەتشىلەرى مەن مۇسىنشىلەرى شاقىرىلادى.
«بايقاۋدىڭ باستى تالاپتارى: ەسكەرتكىش 20 مەتر بيىكتىككە سايكەس كەلىپ، دىبىستىق ەففەكتىلەردى بەرۋى كەرەك جانە مەتال قۇرىلعىدان جاسالۋى شارت»، - دەپ حابارلادى كىتاپحانا.
بايقاۋ 2019-جىلدىڭ 24- ناۋرىزىنان 24- ساۋىرىنە دەيىن جۇرگىزىلەدى.
ماتەريالدار info@nabrk.kz پوشتاسىنا قابىلدانادى. سونىمەن بىرگە، كونكۋرسقا قاتىسۋشىلاردىڭ ەڭبەكتەرى الەۋمەتتىك جەلىدە (Facebook) جاريالانادى جانە داۋىس بەرىلەدى.