الماتىدا اعايىندىلار ناعاشىسىنا باۋىرىن كەسىپ بەردى

 الماتى. قازاقپارات - قازاقستاندا تۇڭعىش رەت ەكى ادامنان ءبىر ادامعا باۋىردىڭ بولىكتەرى سالىندى، دەپ حابارلايدى قازاقپارات ءتىلشىسى.

بولەسى مەن جيەنى ءوزىنىڭ ناعاشى اعاسىنا باۋىرىنىڭ ءبىر بولىگىن بەرگەن. بىرەگەي وتا Dual Graft تەحنولوگياسى بويىنشا ەكى دونوردان ءبىر مەزەتتە ءبىر پاتسيەنتكە اۋىستىرىلدى.

مۇنداي وتا قازاقستاندا، ت م د تەرريتورياسىندا ءبىرىنشى رەت جاسالىپ وتىر.

«بۇل وتا تەحنيكالىق تۇرعىدان وتە كۇردەلى. 15 ساعاتقا سوزىلدى. باقىتىمىزعا وراي وتا ءساتتى ءوتتى. قازىر ەكى دونور پاتسيەنت ۇيلەرىنە جىبەرىلدى. ال باۋىر سالىنعان ازامات قازىر اۋرۋحانادا جاتىر. جاعدايى ءبىرقالىپتى جاقسى»، - دەدى ا. سىزعانوۆ اتىنداعى ۇ ع ح و  ا ق باسقارما ءتوراعاسى بولاتبەك بايماحانوۆ.

15 ساعاتقا سوزىلعان وتانى اتالعان ورتالىق پەن «اسان» كارىس حيرۋرگيا ەمحاناسىنىڭ دارىگەرلەرى بىرلەسىپ جاسادى.

 37 جاستاعى پاتسيەنت نۇركەن سەيىتقۇلوۆقا «باۋىر سيرروزى» دياگنوزى قويىلعان. 3 جىلدان بەرى ەسەپتە تۇرعان. سوڭعى جىلدارى باۋىرىنىڭ اۋرۋى ۇدەپ، ترانسپلانتاتسياعا مۇقتاجدىق تۋعان.

«مەن ءوزىمنىڭ اۋرۋىم جايلى 3 جىل بۇرىن ءبىلدىم. تولىق تەكسەرۋدەن سوڭ ماعان باۋىر اۋىستىرۋ كەرەكتىگى ايتىلدى. ۇلكەن وتباسىنان شىققانبىز. انامنىڭ 9 ءسىڭلىسى بار. ولاردان 54 بولە تاراعان. تۋىستارىمىزدىڭ كوپشىلىگى دونور بولۋعا كەلىستى. ءبىراق، ولاردىڭ ىشىندە مىنا ەكى بالانىڭ عانا باۋىرلارى سايكەس كەلدى. ءبىرىنشى - اللاعا، ەكىنشى دارىگەرلەرگە العىسىمدى ايتامىن. سونىڭ ارقاسىندا مەن تولىققاندى ءومىر سۇرەتىن بولدىم»، - دەدى 37 جاستاعى نۇركەن سەيىتقۇلوۆ.

 جيەنى باۋىرىن ناعاشىسىنا ويلانباستان بەرگەنىن ايتتى.

«وتباسىمىزدىڭ شەڭبەرىندە تالقىلاندى، ارينە. دونورلىقتان باس تارتۋ تۋرالى وي بولعان جوق. ەڭ باستىسى اعامىز قاسىمىزدا. دەنى ساۋ»، - دەدى جيەنى ۇدەكەي ورازبەك.

دارىگەرلەردىڭ ايتۋىنشا، مۇنداي وتالار كوپ جاعدايدا ءتۇرلى اسقىنۋلارعا اكەلۋى مۇمكىن.

سەبەبى دونورلاردا باۋىردىڭ 70 پايىزى عانا قالادى. ولاردىڭ اعزاسىندا باۋىر جەتىسپەۋشىلىگى بولۋى مۇمكىن.

 «باۋىر تەرمينالدى اۋرۋىنا شالدىققان ادامدار ءۇشىن ترانسپلانتاتسيا - تىعىرىقتان شىعاتىن جالعىز جول. قازاقستاندا باۋىرىڭ 90 پايىزى ءتىرى دونورلاردان الىنادى. قايتىس بولعان ادامنان دونورلىق ورگان الۋ بىزدە مەنتاليتەتىمىزگە جات نارسە. الەمدە ءتىرى ەكى دونوردان باۋىر اۋىستىرۋ وڭتۇستىك كورەيا، جاپونيا، تۇركيا، تايۆان، فرانسيا ەلدەرىندە جاسالادى. ءبىزدىڭ ەل وسىنداي وتا جاساعان التىنشى ەل»، - دەدى باسقارما ءتوراعاسى.

قازاقستاندا 2019 -جىلعى دەرەككە سەنسەك، 282 باۋىر اۋىستىرىلعان. ولاردىڭ 47- عانا قايتىس بولعان ادامنان الىندى. ا. سىزعانوۆ اتىنداعى ۇلتتىق عىلىمي حيرۋرگيا ورتالىعىندا بىلتىر 22 باۋىر ءتىرى دونوردان الىندى.

سوڭعى ەكى جىلدا 20 بالانىڭ باۋىرى اۋىستىرىلدى.

ال كۇتىم پاراعىندا 332 پاتسيەنت ءوز كەزەگىن كۇتىپ وتىر.

اۆتور: گۇلميرا عوسمانالي