قازاقستاندا تاعى ءۇش قالانىڭ اتاۋىن اۋىستىرۋ ۇسىنىلدى
11:09, 26 - ناۋرىز 2019
نۇر-سۇلتان. قازاقپارات - «اقجول» دەموكراتيالىق پارتياسىنىڭ ءتوراعاسىنىڭ ورىنباسارى قازىبەك يسا پەتروپاۆل، پاۆلودار جانە سەمەي قالالارىنىڭ اتاۋىن اۋىستىرۋدى ۇسىندى، - دەپ حابارلايدى Tengrinews.kz ءتىلشىسى.
مۇنداي پىكىرىن ول ەلوردا اتاۋىن وزگەرتۋدى قولداۋ ءۇشىن وتكەن دەموكراتيالىق كۇشتەردىڭ «قازاقستان-2050» جالپى ۇلتتىق كواليتسياسىنىڭ وتىرىسىندا ايتتى.
«ەلباسى ەسىمىن قازاقستان ەلورداسىنا بەرىپ، وسى وقيعاعا بايلانىستى باسقا دا قالالاردىڭ اتاۋىن وزگەرتۋدى جالعاستىرۋىمىز قاجەت. پەتروپاۆلعا ءوز كەزىندە وردا قۇرىپ، ءۇش ءجۇزدىڭ باسىن قوسقان ابىلاي حاننىڭ ەسىمىن بەرۋ كەرەك.
پاۆلودارعا حالقىنىڭ تاۋەلسىزدىگى ءۇشىن كۇرەسكەن قازاقتىڭ سوڭعى حانى كەنەسارىنىڭ اتىن بەرۋ كەرەك. بۇرىن الاش اتالعان سەمەيگە الاشوردا ۇكىمەتىنىڭ ءتوراعاسى ءاليحان بوكەيحان ۇلىنىڭ اتىن بەرۋ كەرەك»، - دەدى قازىبەك يسا.
قازىبەك يسا بۇل ۇسىنىستىڭ ءوزىنىڭ جەكە كوزقاراسى ەكەنىن جەتكىزدى.