شىمكەنتتە «باس قالام - نۇر-سۇلتان» اكسياسى ءوتتى
10:21, 26 - ناۋرىز 2019
شىمكەنت. قازاقپارات - بۇگىن شىمكەنتتە «باس قالام - نۇر-سۇلتان» اكسياسى ءوتىپ جاتىر، دەپ حابارلايدى قازاقپارات ءتىلشىسى.
ارباتتا وتكەن شاراعا 10 مىڭعا جۋىق ادام قاتىستى. قازاقستان ەسترادا جۇلدىزدارىنىڭ قاتىسۋىمەن ۇيىمداستىرىلعان اكسيادا جينالعان كوپشىلىك تۇڭعىش پرەزيدەنتىمىز بۇل قۇرمەتكە ابدەن لايىق ەكەنىن تاعى ءبىر رەت ورتاعا سالدى.
«بۇگىندە ەلباسىمىزدىڭ كورەگەن دە سارابدال ساياساتىنىڭ ارقاسىندا جاڭا تاۋەلسىز مەملەكەت قۇرىلىپ، تابىستى جەتىستىكتەرگە جەتتى. شىن مانىندە قازاق ەلىن بارشا الەم تانىپ وتىر. ماڭگىلىك ەلىمىزدىڭ جۇرەگى سانالاتىن استانا قالاسىنىڭ اتاۋى نۇر-سۇلتان بولىپ وزگەرۋىنە تولىق نەگىز بار، ءارى كەلەشەك ۇرپاققا ۇلكەن مارتەبە دەپ بىلەمىز» دەيدى ولار.
مەرەكەلىك اكسيا اياسىندا ەسترادا جۇلدىزدارىنىڭ قاتىسۋىمەن كونسەرت ۇيىمداستىرىلدى. وندا ەرنار ايدار، «وركەن» وتباسىلىق كۆينتەتى، ەركىن نۇرجانوۆ پەن اسىل جانداۋلەتوۆتەر ونەر كورسەتتى.