الماتى حالىق مۋزىكالىق اسپاپتار مۋزەيىنە شاكارىمنىڭ دومبىراسى بەرىلدى

 الماتى. قازاقپارات - الماتىداعى ىقىلاس اتىنداعى حالىق مۋزىكالىق اسپاپتارى مۋزەيىنە شاكارىم قۇدايبەردى ۇلىنىڭ دومبىراسى تاپسىرىلدى، دەپ حابارلايدى قازاقپارات ءتىلشىسى.

قۇندى جادىگەردى مۋزەيگە شاكارىمنىڭ ۇرپاعى تابىستادى.

«مەدعات قۇلجانوۆ اتاسى شاكارىمنىڭ دومبىراسىن جىلدار بويى ساقتاپ كەلگەن. ول شاكارىمنىڭ تىكەلەي ۇرپاعى بولىپ كەلەدى. وعان 15 جىل بۇرىن سەمەي ۋنيۆەرسيتەتتەرىنىڭ ءبىرىنىڭ رەكتورى تاپسىرعان» ، - دەدى مۋزەيدىڭ عىلىمي قىزمەتكەرى قۋانىش كۇلەش.

دومبىرا - قوس ىشەك پەن 13 پەرنەدەن تۇرادى، تۇتاس اعاشتان ويىپ جاسالعان. دومبىرانى كىم ءارى قاشان جاساعانى بەلگىسىز.

شاكارىمنىڭ دومبىراعا اۋەستىگىن كورگەن اباي بىتكەنباي رۋىنان اتاقتى شەبەرلەردى العىزادى.

سول شەبەرلەردىڭ ءبىرى قۇدايبەردى اۋىلىندا 1 جىلداي تۇرىپ ول جاس شاكارىمدى «سايماقتىڭ سارى وزەنى» ، «الشاعىردىڭ اشتى كۇيى» ، «اسان كۇيى» ، «الا بايراق» ، «كەرتولعاۋ» سياقتى اتاقتى كۇيلەردى ۇيرەتەدى.

شاكارىم ىلعي ءوز ەستەلىكتەرىندە دومبىرانى ۇيرەتكەن بىتكەنباي ۇستاز ەكەندىگىن ايتىپ وتىرادى.

14-15 جاسىنان شاكارىم ءوزى مۋزىكا جازا باستايدى.

قۋانىش كۇلەشتىڭ ايتۋىنشا، شاكارىمنىڭ قولىنداعى كۇمبىرلەگەن قارا دومبىرا ەندى حالىق مۇراسىنا اينالماق.

اقىننىڭ ۇرپاقتارى بۇل دومبىرانى كوزىنىڭ قاراشىعىنداي ساقتاپ كەلگەن. مەدگات قۇلجانوۆتىڭ اكەسى كەزىندە شاكارىمنىڭ شىعارمالارىن ورىنداۋعا قۇمارتقان.

بۇگىندە مۋزەيدە 1000 اسا ۇلتتىق اسپاپ ساقتالىپ تۇر.

اباي، ءبىرجان، جامبىل، ىقىلاس، سەيتەك، دينا نۇرپەيىسوۆا، احمەت جۇبانوۆ، كەنەن ازىربايەۆ، ابىكەن حاسەنوۆ تاعى باسقا اقىن- جىراۋلاردىڭ، كومپوزيتورلاردىڭ 60 جۋىق دومبىراسى بار.