اتىراۋدا قازاق كۇرەسىنەن «پوليتسيا بارىسى» ءوتتى

اتىراۋ. قازاقپارات - اتىراۋدا قازاقشا كۇرەستەن «پوليتسيا بارىسى» سايىسى ءوتتى، دەپ حابارلايدى قازاقپارات ءتىلشىسى.

ەلىمىزدىڭ باتىس اۋماعىندا تويلاناتىن «كورىسۋ» مەرەكەسىنە وراي پوليتسيا دەپارتامەنتىنىڭ ۇيىمداستىرۋىمەن قۇقىق قورعاۋ ورگاندارى قىزمەتكەرلەرى اراسىندا قازاقشا كۇرەستەن جارىس ءوتتى.

ناتيجەسىندە، «پوليتسيا بارىسى» اتاعىن قارسىلاستارىنا بوز كىلەمدە دەس بەرمەگەن اعا لەيتەنانت امانبەك ارۋوۆ جەڭىپ الدى.

سپورت پەن قىزمەتتى قاتار الىپ جۇرگەن پوليتسيا دەپارتامەنتىنىڭ جىلدام قيمىلدايتىن ارنايى جاساق ينسپەكتورى امانبەك ارۋوۆ ىشكى ىستەر ورگاندارىندا 5 جىلعا جۋىق قىزمەت ەتەدى. ول بۇعان دەيىن دە سامبو كۇرەسىنەن سپورت شەبەرى، بەلبەۋ كۇرەسىنەن قازاقستان چەمپيونى اتانىپ ۇلگەرگەن. سپورتشى-پوليتسەيگە دەپارتامەنت باسشىلىعى حالىقارالىق جارىستارعا دا قاتىسۋعا مۇمكىندىك جاساپ كەلەدى.

«پوليتسيا بارىسى» سايىسىندا ىشكى ىستەر ورگاندارىنان بارلىعى 11 كوماندا قاتىسىپ، 100 گە جۋىق قىزمەتكەر كۇشتەرىن سىنادى.

ايتا كەتۋ كەرەك، قازىرگى ۋاقىتتا پوليتسيا دەپارتامەنتىندە حالىقارالىق دارەجەدەگى 7 چەمپيون قىزمەت ەتەدى. ونىڭ ىشىندە دەپارتامەنت باستىعى پوليتسيا پولكوۆنيگى ايان دۇيسەمبايەۆتىڭ ءوزى دە بار.