قازاقستان داماسكتەگى ءال- فارابي مادەني ورتالىعىن قالپىنا كەلتىرەدى

بريۋسسەل. قازاقپارات - بەيسەنبىدە بريۋسسەلدە «سيريا مەن وڭىرلەردىڭ بولاشاعىنا قولداۋ كورسەتۋ» ءۇشىنشى حالىقارالىق دونور كونفەرەنسياسى قورىتىندىلاندى، دەپ حابارلايدى قازاقپاراتتىڭ ەۋرووداقتاعى مەنشىكتى ءتىلشىسى.

 ەۋروپا وداعى ب ۇ ۇ- مەن بىرلەسىپ ۇيىمداستىرعان ءۇش كۇندىك فورۋمعا 57 مەملەكەت قاتىستى. كونفەرەنسيا - قارجى رەسۋرستارىن جۇمىلدىرۋ قۇرالى عانا ەمەس، سيريا داعدارىسىن شەشۋ ءۇشىن يدەيالاردى بىرىكتىرۋگە ارنالعان الاڭ.

 ق ر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردىنىڭ ايتۋىنشا، قاتىسۋشىلار ساياسي تاتۋلاسۋعا، ەكونوميكانى قالپىنا كەلتىرۋگە جانە بوسقىنداردى قايتارۋعا كوڭىل اۋدارعان.

قورىتىندى سەسسيادا گۋمانيتارلىق ماسەلەلەر جونىندەگى ەۋروكوميسسار حريستوس ستيليانيديس حالىقارالىق كونفەرەنسيا قاتىسۋشىلارى سيريا مەن وڭىرلەرگە 7 ميلليارد دوللاردان بولۋگە مىندەتتەلدى.

«قازىر سيريامەن كورشىلەس جاتقان جانە ەۋروپالىق مەملەكەتتەردەگى بوسقىنداردى ەلىنە قايتارۋ ماسەلەسى تۇر. ولاردى باسپانامەن، جۇمىسپەن جانە بىلىممەن قامتاماسىز ەتۋ ءۇشىن ءىىرى كولەمدە قارجىلىق جانە گۋمانيتارلىق شىعىندار قاجەت»، - دەدى مۇحتار تىلەۋبەردى.

ب ۇ ۇ باعالاۋى بويىنشا، تەك قانا سيريادا 11,7 ميلليون ادام ءتۇرلى گۋمانيتارلىق كومەككە ءزارۋ.

«قازاقستان ءوز تاراپىنان بارىنشا كومەك كورسەتىپ جاتىر»، - دەپ اتاپ ءوتتى م. تىلەۋبەردى.

ەلىمىز ازىق- تۇلىك جەتكىزۋ ارقىلى كومەك كورسەتكەن. بيىل شامدا 2012 - جىلى ق ر ۇكىمەتى سالعان ءال- فارابي مادەني ورتالىعىن قالپىنا كەلتىرۋ مۇمكىندىگى قاراستىرىلىپ جاتىر.

«داماسكتە بىزگە تىكەلەي قاتىسى بار ۇلكەن ەكى ماۆزولەي بار. بۇل - ءال- فارابي جانە سۇلتان بەيبارىس كەسەنەلەرى. وندا ۇلكەن كىتاپحانا اشىلعان»، - دەپ اتاپ ءوتتى قازاقستاندىق ديپلومات.

 م. تىلەۋبەردىنىڭ سوزىنشە، كونفەرەنسيا قاتىسۋشىلارى سيريادان 47 قازاقستان ازاماتىن ەۆاكۋاتسيالاۋ تۋرالى «جۋسان» گۋمانيتارلىق وپەراتسياسىن جوعارى باعالاعان.

اۆتور: تيمۋر دۇيسەكەيەۆ