گيتلەر قازىناسىنىڭ كارتاسى تابىلدى
«كۇندەلىكتە ەكىنشى دۇنيەجۇزىلىك سوعىس كەزىندە جاسىرىلعان قازىنالاردىڭ مەكەن- جايى بار»- دەپ حابارلايدى Daily Mail پورتالى.
كۇندەلىكتەگى مالىمەتكە قاراعاندا، ادولف گيتلەر پولشادان شەگىنۋ كەزىندە التىن، كوركەم تۋىندىلار مەن باسقا دا باعالى زاتتاردى جاسىرۋدى بۇيىرعان. بۇل قازىنالار 260 جۇك كولىگىنە تيەلىپ، كەڭەس اسكەرى تابا الماۋى ءۇشىن ەل اۋماعىنداعى 11 قۇپيا ورىنعا جاسىرىلعان.
ەگون وللەنحاۋەردىڭ جازۋىنشا، قۇپيا ورىنداردا 28 توننا التىن، زەرگەرلىك بۇيىمدار، مەدالدار، ءدىني زاتتار، سونىمەن بىرگە، فرانسيادان ۇرلانعان بوتتيچەللي، رۋبەنس، كاراۆادجو، مونە، رافاەل مەن رەمبراندت سىندى سۋرەتشىلەردىڭ 47 كارتيناسى بار. وسى ۋاقىتقا دەيىن، وللەنحاۋەر كۇندەلىگى گەرمانيانىڭ كۆەدلينبۋرگ قالاسىنداعى ماسوندار لوجاسىندا ساقتالىپ كەلگەن. كەيىن قولجازبا Schlesische Brücke قورىنا وتكەن. قولجازبا ماسوندار لوجاسى قويعان تالاپتارعا سايكەس بۇرىن ەش جەردە جاريالانباعان. ولار وسى وقيعانىڭ بەل ورتاسىندا بولعان ادامدار مەن سوعىسقا قاتىسقاندار جانە "ۆاففەن سس" مۇشەلەرىنىڭ كوزى تىرىسىندە كۇندەلىكتى جاريالاۋدان باس تارتقان.
uk Schlesische Brücke قورىنىڭ وكىلى رومان فۋرمانياكتىڭ ايتۋىنشا، گەرمانيالىق 5 ءبىلىم ورداسى كۇندەلىكتىڭ شىنايى ەكەنىن راستاعان. قازىر ءۇشىنشى رەيح قازىنالارى بولۋى مۇمكىن نىساندار زەرتتەلىپ جاتىر. نەگىزىنەن، قىمبات بۇيىمدار پولشاداعى كول تۇبىندەگى سارايلاردىڭ بىرىندە قۇپيا بولمەدە جانە باقتاعى قۇدىق ىشىنە جاسىرىلعان بولۋى مۇمكىن دەگەن جورامالدار بار.
Massaget.kz