رەسەيلىك بويجەتكەن سوعىستا قازا تاپقان قازاقستاندىقتاردىڭ تۋىستارىن ىزدەستىرۋدە

الماتى. قازاقپارات - قازاق-ورىس دوستىعى قاۋىمداستىعىنىڭ ءتورايىمى، «ەۋرازيا ديالوگى» حالىقارالىق قورىنىڭ باسشىسى ايجان تۇزەلبەكوۆا قازاقپارات تىلشىسىنە «ۆاحتا پامياتي» اكسياسى تۋرالى ايتىپ بەردى.

ايجان تۇزەلبەكوۆا يۆانوۆو قالاسىنىڭ تۇرعىنى.

ول دۇنيەجۇزى قازاقتارى قاۋىمداستىعى جانە رەسەيدەگى قازاقستان ەلشىلىگىمەن، قازاقستان حالىقتارى قاۋىمداستىعىمەن بىرىگە وتىرىپ يۆانوۆو وبلىسىندا «ۆاحتا پامياتي» جوباسىن جۇزەگە اسىرىپ كەلەدى.

ونىڭ ايتۋىنشا، جۇمىس توبى ەكىنشى دۇنيەجۇزىلىك سوعىسى مايدانىندا كوز جۇمعان 37 جاۋىنگەردىڭ ءتىزىمىن تاۋىپ العان. بۇل ازاماتتاردىڭ بارلىعى يۆانوۆو وبلىسىنىڭ شۋيا قالاسىندا گوسپيتالدە قايتىس بولعان. شۋيا ماسكەۋدەن 300 شاقىرىم قاشىقتىقتا ورنالاسقان.

ەكىنشى دۇنيەجۇزىلىك سوعىس كەزىندە مۇندا 11 ەۆاكوگوسپيتال بولعان.

سول كەزدەگى مەديتسينا عىلىمىنىڭ دەڭگەيىنە بايلانىستى بارلىق ساربازدى امان الىپ قالۋ مۇمكىن بولماعان.

«شۋيا قالاسىنىڭ اسكەري كوميسسارياتى 37 قازاق جاۋىنگەرىنىڭ ءتىزىمىن جاساعان. ولاردىڭ بارلىعى گوسپيتالدە بەتى بەرى قاراماي كوز جۇمدى. نەگىزىنەن ادامدار تۋبەركۋلەز اۋرۋىنان قايتىس بولعان. 28 ساربازدىڭ دياگنوزى سونداي بولعان. ەكى ادام - ديستروفيادان، 2 ادام وق جاراقاتىنان ولگەن. 36-سى جاۋىنگەر، ال 1 ساربازدىڭ شەنى كىشى سەرجانت بولعان. ولاردىڭ قازاقستاننىڭ قاي جەرىنەن كەلگەنى ءار قۇجاتتا ءارتۇرلى جازىلعان. كەي جەرلەردە قازاق ك س ر دەلىنسە، كەي قۇجاتتاردا اقتوبە، الماتى، سەمەي، قوستاناي وبلىسى دەپ كورسەتىلگەن. قازاق ساربازدارى شۋيا قالاسىنداعى ترويتسك، ۆوزنەسەن زيراتتارىندا جەرلەنگەن. وسى كىسىلەردىڭ تۋىستارى ءبىزدى تاۋىپ كەلەدى دەپ ويلايمىز»، - دەدى ايجان تۇزەلبەكوۆا.

بويجەتكەننىڭ اكەسى شىمكەنتتىڭ قازاعى.

«مەنىڭ اكەم شىمكەنتتەن. مەنىڭ اناممەن يۆانوۆو قالاسىندا تانىسقان. سوسىن ەكەۋى ۇيلەنگەن. كەڭەس وداعى ىدىراعان سوڭ ولار رەسەيدە قالىپ قويعان. وتباسىندا 5 بالامىز. قازىر نەمەرە-شوبەرە ءسۇيىپ وتىر. ەكىنشى دۇنيەجۇزىلىك سوعىس تاقىرىبى ماعان وتە جاقىن. سەبەبى 1943 -جىلى مەنىڭ اتام ءىز-ءتۇسسىز كەتتى. ىزدەپ تابۋعا تىرىستىق، ءبىراق ءالى ناتيجەسىز. شىمكەنتتە داڭق اللەياسى بار. وندا مەنىڭ اتامنىڭ تەگى جازىلعان. ازىرگە بىزدە بار جادىگەر سول عانا»، - دەدى ايجان تۇزەلبەكوۆا.

ايجان وسى ماقساتتا قازاقستانعا بىرنەشە رەت ساپارلاپ كەلگەن. ال الماتىعا ءبىرىنشى رەت كەلىپ وتىر. ول ءوزىنىڭ ۇلتتىق تەگىن، ۇرپاق ساباقتاستىعىن جوعالتقىسى كەلمەيتىنىن ايتتى.

«ىزدەپ جاتىرمىن. ءبىراق، كوپتەگەن ارحيۆتەر قايتا كوشىرىلگەندىكتەن، ارىپتەر اۋىسىپ، قۇجاتتار جوعالىپ، ىزدەۋ قيىنعا ءتۇسىپ جاتىر. وسى تىزىمدەگى ازاماتتاردى تانىعان ادامدار بولسا، ولاردىڭ جاقىندارىنا حابار بەرىپ، دۇنيەجۇزى قازاقتارى قاۋىمداستىعىنا 77172500706+ حابارلاسۋىن سۇرايمىز»، - دەدى ا. تۇزەلبەكوۆا.