قازاق كۇرەسى حالىقارالىق فەدەراتسياسىنىڭ باسپا ءسوز حاتشىسى اقسۇلۋ ارزىقۇلوۆا قازاقپارات تىلشىسىنە حابارلاعانداي، دجوردجي ۆيتتوريو ەسىمدى يتاليالىق بالۋان قازاقستانداعى فەدەراتسياعا حابارلاسقان.
«دجوردجي ۆيتتوريونىڭ ءوزى جەكپە- جەكپەن، دزيۋدومەن، بەلكۇرەسپەن، سونداي- اق وزبەكتىڭ كۋراشىمەن اينالىسادى. ءبىزدىڭ قازاق كۇرەسى تۋرالى ەستىپ، ۆيدەوسىن كورگەننەن كەيىن قاتتى قىزىقتى. قازىردىڭ وزىندە يتاليادا قازاق كۇرەسى فەدەراتسياسىن اشىپ وتىر. ەندى بۇگىنگى تاڭدا سەمينار وتكىزۋ ءۇشىن بىزدەن تورەشىلەر مەن نۇسقاۋشىلاردى سۇراۋدا»، - دەيدى اقسۇلۋ ارزىقۇلوۆا.
ونىڭ ايتۋىنشا، وسى جىلدىڭ ماۋسىم ايىندا پولشادا قازاق كۇرەسىنەن ەۋروپا چەمپيوناتى وتەدى. قازاق كۇرەسى حالىقارالىق فەدەراتسياسى اتالمىش سايىسقا يتاليالىق بالۋانداردى قاتىستىرۋعا كۇش سالىپ جاتىر.
«پولشادا ەۋروپا چەمپيوناتى 9 سالماق بويىنشا (8 سالماق جانە ابسوليۋت) وتەدى. پولشا، گۇرجىستان، رەسەي، ليتۆا، لاتۆيا، ارمەنيا ەلدەرىنىڭ بالۋاندارى ناقتى كەلەتىندەرىن ايتىپ وتىر. 17 تورەشى تورەلىك ەتەدى. ونىڭ جارتىسى - شەتەلدىك»، - دەيدى ول.
ەسكە سالا كەتسەك، قازاق كۇرەسى فەدەراتسياسى بىلتىر يراندا دا قۇرىلعان بولاتىن.
اۆتور: ايان بەكەن ۇلى