قىتاي ۇشىرماق بولىپ وتىرعان زوند مارس وربيتاسىنا شىعىپ، كەيىن قىزىل عالامشارعا قونادى. قىتايلىقتار وسى زوند مارس بەتىن تولىققاندى زەرتتەيدى دەپ ۇمىتتەنىپ وتىر.
ۆۋ ۆەي رەننىڭ ايتۋىنشا، قىتاي «Change 5» باعدارلاماسىن قايتا قولعا الىپ، بيىل جەلتوقسانعا دەيىن زوندتى ايعا ۇشىرماق. ەگەر ول اي بەتىنەن الىنعان ۇلگىلەردى جيناپ، جەرگە ءساتتى ورالسا، قىتاي ا ق ش جانە بۇرىنعى كەڭەس وداعىنان كەيىنگى وسى تەحنولوگيانى يگەرگەن ءۇشىنشى ەل اتانادى.
مارسقا قاتىستى زەرتتەۋ جۇمىستارىن جۇرگىزۋ ءارى تۋريستەردى تارتۋ ماقساتىندا جۋىردا قىتايدىڭ العاشقى مارس سيمۋلياتسيالىق لاگەرى رەسمي تۇردە پايدالانۋعا بەرىلدى. لاگەر شحينحاي پروۆينتسياسىنىڭ حايسي وبلىسىنداعى لەڭحۋ ەلدى مەكەنىندە ورنالاسقان. بۇل ايماقتىڭ گەومورفولوگيالىق ەرەكشەلىكتەرى مارسقا وتە جاقىن. 80 اكردان تۇراتىن لاگەردە 160 ادامعا ارنالعان ۇيىقتايتىن كابينالار مەن شاتىرلار بار. تۇتاستاي العاندا، لاگەردە مارس بەتىندەگىگە بارىنشا ۇقساس جاعداي جاسالعان.
قىتاي جاڭالىقتار اقپاراتتىق اگەنتتىگىنىڭ حابارلاۋىنشا، بيلىك 2017 -جىلى 150 ميلليون يۋان قاراجات ءبولىپ، تۋريستىك بازا قۇرۋ ماقساتىمەن «لەڭحۋ مارس قالاشىعى» اتتى جوبانى ىسكە اسىرۋعا كىرىسكەن.
جۇرتتىڭ يگىلىگىنە بەرىلگەن لاگەردەگى زەرتتەۋشىلەرگە ارنالعان استرونوميالىق قوندىرعىلار الداعى ۋاقىتتا مارسقا جىبەرىلەتىن ەكسپەديتسيانى سىناقتان وتكىزۋگە مۇمكىندىك بەرەدى.
لاگەردىڭ اشىلۋ سالتاناتىندا «مارسقا قونۋدىڭ مودەلى» ەكسپەريمەنتى دە ۇيىمداستىرىلعان. الايدا، تەحنيكالىق اقاۋلارعا بايلانىستى سىناق ءساتسىز اياقتالعان.