كوپبالالى وتباسىلارعا مامىر ايىنان باستاپ باسپانا بەرىلەدى

استانا. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى رومان سكليار كوپبالالى وتباسىلارعا جالدامادى باسپانا تاراتۋدىڭ مەرزىمىن اتادى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، بۇگىندە رەسپۋبليكا بويىنشا 340 مىڭ كوپبالالى وتباسى بار. سونىڭ ىشىندە 28 مىڭ وتباسى تۇرعىن ءۇي كەزەگىندە تۇر.

«مەملەكەت باسشىسىنىڭ تاپسىرماسىنا سايكەس، ءبىز جەتى جىلدىڭ ىشىندە جىل سايىن 6 مىڭ جالدامالى پاتەردى سالىپ وتىرامىز. ءسويتىپ، 2025 -جىلعا دەيىن 40 مىڭنان استام جالدامالى پاتەر تۇرعىزىلادى. سول كەزدە كەزەكتە تۇرعان كوپبالالى وتباسىلاردىڭ باسپانا ماسەلەسى تولىعىمەن شەشىلەدى. بيىل مامىر ايىندا ءبىز كوپبالالى وتباسىلارعا جالدامالى پاتەردى بەرۋدى باستايمىز» ، - دەدى ر. سكليار ۇكىمەتتىڭ بۇگىنگى وتىرىسىندا.

 ايتا كەتەيىك، «نۇر وتان» پارتياسىنىڭ كەزەكتى XVIII سەزىندە مەملەكەت باسشىسى نۇرسۇلتان نازاربايەۆ «نۇرلى جەر» باعدارلاماسىن كەڭەيتىپ، سونىڭ اياسىندا كوپبالالى وتباسىلارعا 40 مىڭ جالدامالى پاتەر سالۋدى تاپسىردى.

«ۇكىمەتكە «نۇرلى جەر» باعدارلاماسى اياسىندا كوپبالالى وتباسىلار ىشىندەگى از قامتىلعان وتباسىلارعا باسىمدىق بەرە وتىرىپ، 40 مىڭنان استام جالدامالى پاتەر سالۋدى تاپسىرامىن. بۇل ماقساتقا تاياۋ 7 جىلدا جىل سايىن 50 ميلليارد تەڭگە بولىنەتىن بولادى» ، - دەدى نۇرسۇلتان نازاربايەۆ.