ءار وتباسىنىڭ جەكە دارىگەرى بولۋىن قولعا الۋدامىز - ەلجان ءبىرتانوۆ

استانا. قازاقپارات - ق ر دەنساۋلىق ساقتاۋ ءمينيسترى ەلجان ءبىرتانوۆ پارتيا سەزىنەن كەيىن دەنساۋلىق سالاسىنا قاتىستى اتقارىلاتىن جۇمىستار تۋرالى تۇسىنىكتەمە بەردى، دەپ حابارلايدى قازاقپارات ءتىلشىسى.

 «ەلباسى ايتىپ وتكەندەي، الدىمەن قولعا الاتىن دۇنيە ول العاشقى مەديتسينالىق جانە امبۋلاتوريالىق كومەك. ونىڭ سەبەبى دە تۇسىنىكتى، دامىعان ەلدەردە دارىگەرلەردىڭ كومەگىنىڭ 80 پايىزى ول العاشقى مەديتسينالىق كومەك كەزىندە ۇسىنىلادى»، - دەدى ە. ءبىرتانوۆ.

سونداي- اق، مينيستر دەنساۋلىق ساقتاۋ سالاسىنا بولىنەتىن قوسىمشا قاراجاتتىڭ 40 پايىزدان 60 پايىزعا ارتتىرۋعا قاتىستى دا توقتالىپ ءوتتى.

 «60 پايىزعا دەيىن ءوسىرۋ دەگەنىمىز ول ءار ادامدى، وتباسىن جەكە دارىگەرمەن قامتاماسىز ەتۋ دەگەن ءسوز. ءبىز بۇل باعىتتا ءاربىر وتباسىنىڭ جەكە دارىگەرى بولۋىن قازىردەن قولعا الۋدامىز. سونداي- اق، جەدەل جاردەمنىڭ جىلدامدىعىن ارتتىرۋ ءۇشىن قالاداعى كوپقاباتتى ۇيلەردىڭ ءبىرىنشى قاباتىندا شاعىن ديسپانسەرلىك ورتالىق بولۋى ءتيىس. بۇگىنگى تاڭدا بۇل باعىتتا جوسپار جاسالىپ، بارلىق وڭىرلەرمەن بەكىتىلدى. بۇل ورتالىقتار مەملەكەتتىك- جەكەمەنشىك ارىپتەستىك نەگىزىندە سالىنىپ، جۇزەگە اسىرىلاتىن بولادى»، - دەدى مينيستر.

ءمينيستردىڭ ايتۋىنشا، سوندا عانا مەديتسينا قىزمەتىنىڭ ساپاسى مەن قولجەتىمدىلىگى ارتادى.

ايتا كەتسەك، بۇگىنگى «نۇر وتان» پارتياسىنىڭ كەزەكتى سەزىندە ەلباسى دەنساۋلىق سالاسىن دامىتۋعا قوسىمشا 120 ميلليارد تەڭگە قارجى ءبولۋدى تاپسىردى.

اۆتور: داۋلەت ىزتىلەۋ