قوستانايلىق كوپ بالالى وتباسى ەلىمىزدەگى ەڭ ۇزىن مۇز توبەشىكتى جاساپ شىعاردى
ونى كوپبالالى ماكاشوۆتار وتباسى اۋىلداستارىنا تارتۋ رەتىندە وزدەرى تۇرعىزعان. ليۋبلين اۋىلىندا ەگىزدەر ءجيى دۇنيەگە كەلەدى ەكەن. سوسىن كەز كەلگەن ءوڭىردى جەرسىنە بەرمەيتىن تاڭقۋراي، قارا بۇلدىرگەن دە بۇل اۋىلدا جاپىراق جايعان. ەندى مىنە ءوز قولدارىمەن بيىك مۇز توبەشىك كوتەرىپ، ەل- جۇرتتى تاعى تاڭعالدىرىپ وتىر.
ماعاۋيا قاليوۆ، ءتىلشى:
- اۋىل ورتاسىندا تۇرعىزىلعان بيىكتىگى 10 مەتردەي، ۇزىندىعى 100 مەترگە جۋىق مۇز توبەشىك جەرگىلىكتى تۇرعىنداردىڭ ماقتانىشىنا اينالعان. مۇندا كورشى اۋىلداردان دا كەلەدى ەكەن. دەمالىس كۇنى ويىن بالاسىنىڭ ءبارى وسىندا. ءتىپتى مەن سياقتى ەرەسەكتەردىڭ ءوزى ءبىر ءسات سىرعاناق تەبۋدەن كەت ءارى ەمەس. مۇز توبەشىكتى جەرگىلىكتى اعايىندى ءتورت جىگىت كوتەرگەن. ولار ءبىر اپتا بويى قار تاسىپ، سۋ قۇيىپ، جاقتاۋلارىن قاشاپ، وسىنداي اتتراكتسيوندى جاساپ شىعاردى. اۋىلداستارىنىڭ ماكاشوۆتار وتباسىنا ايتار العىستارى شەكسىز.
سۆەتلانا دونەتس، ليۋبلين اۋىلىنىڭ تۇرعىنى:
- بۇل جەرگە بالالارمەن بىرگە اتا- انالار دا كەلەدى. كادىمگىدەي تازا اۋادا شۇيىركەلەسىپ، اڭگىمەلەسىپ، دەمالىپ قايتامىز. ەڭ باستىسى بالالار قازىر كومپيۋتەرگە تەلمىرۋدى قويدى.
كوپبالالى ماكاشوۆتار وتباسى تاتۋ- ءتاتتى تىرلىگىمەن، ەڭبەكقورلىعىمەن كوپكە ۇلگى. ۇيدەگى، تۇزدەگى قاي شارۋاعا دا ولار ءبىر كىسىدەي جۇمىلا كەتەدى.