بيىلدان باستاپ ەلىمىزدە جەكە كۋالىكتىڭ ورنىنا ساۋساق ىزدەرىن قولدانۋعا بولادى

استانا. قازاقپارات - ياعني ەلىمىزدە قۇجات اينالىمىنىڭ باسىم بولىگى ۆيرتۋالدى نۇسقاعا اۋىستىرىلىپ جاتىر. ءبىراق وكىنىشكە وراي، ونى قاراپايىم ادامداردىڭ قولدانىسى وتە تومەن. ويتكەنى حالىققا قىزمەت كورسەتۋ ورتالىقتارىندا ءالى كۇنگە دەيىن ۇزىن- سونار كەزەك.

بيومەتريا، ياعني ادام تۋرالى اقپاراتتى ساۋساق ءىزى ارقىلى الۋ. ءبىز بۇنداي كورىنىستى شەتەلدىك فيلمدەردەن عانا كورىپ، فانتاستيكا جانرىنا جاتقىزىپ ءجۇرۋشى ەك. وتاندىق ماماندار انە- مىنە دەگەنشە قولدانىسقا دا ەنگىزىپ ۇلگەرىپتى. ەندى حالىققا قىزمەت كورسەتۋ ورتالىقتارىنا جەكە كۋالىكسىز- اق بارۋعا بولادى. ساۋساق ءىزىڭىز ارقىلى تۇلعاڭىزدى انىقتاپ، قولدان كەلگەن قىزمەتتەن ايانبايمىز دەيدى.

ءبىراق، بۇنداي تەحنولوگيالىق جەتىستىكتەردى ەنگىزگەن تۇستا پارالەل ءتۇسىندىرۋ جۇمىستارىنا ەرەكشە كوڭىل بولگەن ابزال. ويتكەنى، كوپشىلىك ءالى كۇنگە دەيىن ەلەكتروندى قولتاڭبامەن الىسىپ الەك. باستامانىڭ يگىلىگىن كورەمىز دەگەندەر، كەرىسىنشە، ءتۇرلى كەدەرگىگە تاپ بولىپ جاتادى. ونىڭ ىشىندە، قولتاڭبانى جاڭارتىپ وتىرۋ كەرەكتىگى جانە ول ءۇشىن ءبارىبىر ءوز اياعىڭمەن ورتالىققا بارۋ كەرەكتىگى تۋرالى پىكىر الەۋمەتتىك جەلىدە تولىپ ءجۇر.

 جانسايا ءابدىرايىموۆا،  ح ق ك و قىزمەتكەرى:

 - ءيا، ەلەكروندى قولتاڭبا سىزگە تيەسىلى ەكەنىن حالىققا قىزمەت كورسەتۋ ورتالىعىنا كەلىپ، راستاۋىڭىز كەرەك. نەگىزى بۇل جاعداي قولتاڭبانىڭ قولدانۋ مەرزىمى اياقتالۋىنا بايلانىستى كەزدەسەدى. ال، ەگەر وسى اۋرەشىلىكتى اينالىپ وتكىڭىز كەلسە، مەرزىمى اياقتالماي تۇرىپ راسىمدەۋىڭىز كەرەك. ول ءۇشىن ارنايى سايتتا ەلەكتروندى پوشتاڭىزدى قالدىرىڭىز. قولتاڭبانىڭ ءبىر جىلدىق ۋاقىتى اياقتالار كەزدە سول پوشتاعا ەسكەرتۋ كەلەدى.

 ورتالىق قىزمەتكەرمەن ءبىراز سويلەستىك. تۇسىنگەنىم، ولاردىڭ ۇسىنىپ وتىرعان قىزمەتتەرى وتە ءتيىمدى. ارينە، ەگەر قولدانۋ تەتىگىن بىلسەڭ. ماسەلەن، قازىر پسيحياتر نە ناركولوگ بەرەتىن انىقتالمالاردى ۇيدەن شىقپاي- اق الۋعا بولادى. ءتىپتى، وسى حالىققا قىزمەت كورسەتۋ ورتالىعىنداعى كەزەكتىڭ ءوزىن، ۋاقىت جوعالتپاۋ ءۇشىن، ەلەكتروندى تۇردە الىپ قويۋ مۇمكىندىگى بار. ول ءۇشىن قولداعى سمارتفونعا قاجەتتى باعدارلامانى جۇكتەپ، دۇرىس قولدانا بىلگەن ابزال. ءدال وسىنداي ادىسپەن قازىر مەديتسينالىق قىزمەتتەردى دە الۋعا بولادى دەيدى ماماندار.

ەلدوس نۇراحمەت ۇلى، قالالىق №9 اۋرۋحانانىڭ باعدارلاماشىسى:

- بۇل بولماي تۇرعان كەزدە ەمدەلۋشى كەلەدى، ۇزىن- سونار كەزەككە تۇراتىن ەدى. ەندى قازىر وسى ارقىلى قابىلداۋعا جازىلۋعا بولادى. دارىگەردى ۇيگە شاقىرۋ جانە مەديتسينالىق مۇراعات، قارالۋ كۇندەلىگى، زەرتحانالىق ناتيجەلەرىن وسى جەردەن السا بولادى.

نەگىزى بۇل سالاداعى سيفرلاندىرۋعا قاتىستى سۇراق وتە كوپ. ءبىراق، كوش جۇرە تۇزەلەدى دەگەن بار ەمەس پە؟! ەڭ باستىسى، سالاداعى قۇجاتباستىلىقتى تولىقتاي جويىپ، بارىنشا ءتيىمدى قىزمەت كورسەتۋگە تالپىنىس جاسالىپ جاتىر. ەندى وسى جۇيەنى مەديتسينالىق قىزمەتتى الۋشىلاردىڭ دا، كورسەتۋشىلەردىڭ دە تەزىرەك يگەرگەنى قاجەت دەيدى ماماندار.

www.24.kz