كونستيتۋتسيالىق كەڭەس رەسپۋبليكا پرەزيدەنتىنىڭ ءوتىنىشى بويىنشا شەشىم شىعاردى

استانا. قازاقپارات - ق ر كونستيتۋتسيالىق كەڭەسى پرەزيدەنت نۇرسۇلتان نازاربايەۆتىڭ ءوتىنىشى بويىنشا قابىلداعان رەسپۋبليكا كونستيتۋتسياسىنىڭ 42-بابىنىڭ 3-تارماعىن رەسمي ءتۇسىندىرۋ تۋرالى نورماتيۆتىك قاۋلىسىن جاريا ەتتى، دەپ حابارلايدى قازاقپارات.

«وسىعان دەيىن حابارلانعانداي، مەملەكەت باسشىسىنىڭ وتىنىشىندە كونستيتۋتسيانىڭ 42-بابىنىڭ 3-تارماعىندا بەلگىلەنگەن قازاقستان رەسپۋبليكاسى پرەزيدەنتىنىڭ وكىلەتتىگىن مەرزىمىنەن بۇرىن توقتاتۋ نەگىزدەرىنىڭ تىزبەسى تولىق بولىپ تابىلادى ما، دەگەن سۇراق قويىلعان بولاتىن.

كونستيتۋتسيالىق كەڭەس اتالعان نورمادا پرەزيدەنتتىڭ وكىلەتتىگىن مەرزىمىنەن بۇرىن توقتاتۋ نەگىزدەرى تولىق ەمەس دەپ ءتۇسىندىردى.

كەڭەستىڭ پىكىرىنشە، نەگىزگى زاڭنان مەملەكەت باسشىسىنىڭ وتستاۆكاعا شىعۋ قۇقىعى تۋىندايدى. اتالعان قۇقىق پرەزيدەنتتىك باسقارۋ نىسانى مەن رەسپۋبليكا پرەزيدەنتىنىڭ كونستيتۋتسيالىق مارتەبەسىنىڭ ەلەمەنتى بولىپ تابىلادى. ول ادام ءارى قازاقستان ازاماتى رەتىندە پرەزيدەنتكە تيەسىلى جانە ءار تۇلعانىڭ كونستيتۋتسيالىق قۇقىقتارىن، سونىڭ ىشىندە ەڭبەك ەتۋ بوستاندىعىنا، قىزمەت پەن كاسىپ ءتۇرىن ەركىن تاڭداۋىنا قۇقىعىن بەكىتەتىن كونستيتۋتسيانىڭ باسقا دا ەرەجەلەرىنەن تۋىندايدى (13-باپتىڭ 1-تارماعى، 24-باپتىڭ 1-تارماعى جانە ت. ب. ).

كونستيتۋتسيالىق كەڭەس كونستيتۋتسيا 42-بابىنىڭ 3-تارماعىنداعى «سونداي-اق پرەزيدەنت قىزمەتىنەن مەرزىمىنەن بۇرىن بوساتىلعان... جاعدايدا...» دەگەن ءسوز تىركەسى ونىڭ وكىلەتتىگىن مەرزىمىنەن بۇرىن توقتاتۋدىڭ نەگىزى رەتىندە مەملەكەت باسشىسىنىڭ وتستاۆكاعا شىعۋىن دا قامتيدى دەپ ەسەپتەيدى. نورماتيۆتىك قاۋلىنىڭ تولىق ءماتىنى باسپا سوزدە جاريالانادى»، - دەلىنگەن كونستيتۋتسيالىق كەڭەس سايتىندا.

ەسكە سالايىق، مەملەكەت باسشىسى كونستيتۋتسيانىڭ 42-بابىنىڭ 3-تارماعىنا رەسمي تۇسىندىرمە بەرۋ تۋرالى كونستيتۋتسيالىق كەڭەسكە ءوتىنىش جولداعان بولاتىن. 2019 -جىلعى 4 -اقپاندا پرەزيدەنتتىڭ ءوتىنىشى كونستيتۋتسيالىق ءىس جۇرگىزۋگە قابىلداندى.