ا ق ش- تاعى ءىرى الاياقتىق: قازاقستان ازاماتتارىنا قاتىستى العاشقى سوت وتىرىسى ءوتتى

 استانا. قازاقپارات - ا ق ش- تا ءىرى الاياقتىق ءىسى بويىنشا العاشقى سوت وتىرىسى ءوتتى. اتالعان قىلمىستىق ارەكەتكە ءۇش قازاقستان ازاماتىنىڭ قاتىسى بار، دەپ حابارلايدى قازاقپارات ءتىلشىسى ق ر سىرتقى ىستەر مينيسترلىگىنە سىلتەمە جاساپ.

مينيسترلىكتىڭ رەسمي وكىلى ايبەك سمادياروۆتىڭ ايتۋىنشا، اعىمداعى جىلى 7 - اقپاندا العاشقى سوت وتىرىسى ءوتتى.

«كەلەسى سوت وتىرىسىن مامىر ايىنا اۋىستىردى. سەبەبى تەرگەۋ شارالارى جالعاسىپ جاتىر» ، - دەدى ا. سمادياروۆ استانادا وتكەن باسپا ءسوز ءماسليحاتىندا.

ايتا كەتەيىك، وتكەن جىلى شەتەلدىك بۇقارالىق اقپارات قۇرالدارى نيۋ- يورك قالاسىندا قىلمىستىق توپتىڭ ۇستالعانى جايىندا جازعان بولاتىن. 25 ادام ءىرى الاياقتىقپەن اينالىستى. ولار عالامتوردا جالعان حابارلاندىرۋلاردى ورنالاستىرىپ، كولىكتەردى ساتقان. الايدا ۋاقىتشا فيرمالار ارقىلى الدىن الا تولەم العاننان كەيىن ىزدەرىن جاسىرىپ وتىرعان. وسىلايشا، الاياقتار 4,5 ميلليون دوللاردى قولدى قىلعان. نيۋ- يورك شتاتىنىڭ زاڭناماسى بويىنشا قىلمىسكەرلەر 20-30 -جىلعا دەيىن باس بوستاندىعىنان ايىرىلۋى مۇمكىن. اتالعان قىلمىستىق توپتىڭ قۇرامىندا ءۇش قازاقستان ازاماتى دا بولدى. ولار - ازيزا دجاۆادازادە نەمەسە دجالولوۆا، 1994 -جىلى تۋعان، ديورا ءاشىروۆا، 1991 -جىلى تۋعان، جانە ەلەنا قۇدايبەرگەنوۆا، 1970 -جىلى تۋعان. باس كەزىندە ولاردى قاماۋعا الدى. ءبىراق ارتىنان كەپىلدىك تولەگەننەن كەيىن ۇشەۋىن دە بوساتتى.