ب ا ق: رەسەيدىڭ قاناتتى زىمىراندارى قايدا تۇرعانى ءمالىم
بۇل تۋرالى باتىس بارلاۋىنداعى دەرەككوزدەرىنە سىلتەمە جاساپ گەرمانيالىق Frankfurter Allgemeine Sonntagszeitung گازەتى حابارلادى.
ونىڭ جازۋىنشا، رەسەيلىك زىمىران ديۆيزيوندارى سولتۇستىك وسەتياداعى موزدوك قالاسى ماڭىندا جانە يۆانوۆ وبلىسىنداعى شۋيا قالاسىنىڭ ىرگەسىندە تۇر.
گازەت بۇعان دەيىن قاناتتى زىمىران قوندىرعىلارى رەسەيدىڭ وڭتۇستىگىندەگى كاپۋستين يار سىناق پوليگونى مەن ەكاتەرينبۋرگ قالاسىنان شىعىسقا قاراي ورنالاسقان كامىشالوۆ قالاسىنىڭ تۇبىندە ەكەنى بەلگىلى بولاتىن دەپ جازادى.
باسىلىم دەرەگىنشە، رەسەيلىك ءتورت اسكەري ديۆيزيوننىڭ اربىرىندە ءتورت-تورتتەن 9M729 زىمىرانىن ۇشىراتىن دوڭگەلەكتى ءتورت قوندىرعىدان بار. بۇل رەسەيدە كەمىندە وسىنداي 64 زىمىران بارىن كورسەتەدى، ولارعا كونۆەنتسيالىق وقتۇمسىقتى دا، يادرولىق وقتۇمسىقتى دا ورناتۋعا بولادى دەلىنگەن ماقالادا.
2350 شاقىرىمعا دەيىنگى راديۋستاعى نىسانانى جوياتىن زىمىراندار قازىرگى تۇرعان جەرىنەن شىعىس جانە سولتۇستىك ەۋروپاعا دەيىن جەتە الادى دەيدى ماقالا اۆتورلارى.
ال ەگەر زىمىرانداردى رەسەيدىڭ باتىسىنا قاراي كوشىرەتىن بولسا، وندا پورتۋگاليادان وزگە ەۋروپالىق ەلدەردىڭ بارلىعىنا قاۋىپ تونەدى دەپ جازادى باسىلىم.
رەسەي بولسا 9M729 قاناتتى زىمىراندارىنىڭ ۇشۋ قاشىقتىعى 480 كيلومەتردەن اسپايدى دەپ مالىمدەيدى.
«ازاتتىق»