قازاقستانعا جەتكىزىلەتىن شەتەلدىك ءدارى-دارمەكتەردىڭ ساپاسى قالاي قاداعالانىپ جاتىر؟
بۇل تۋرالى و ك ق- دا وتكەن باسپا ءسوز ءماسليحاتىندا ق ر د س م دارىلىك زاتتاردى، مەديتسينالىق ماقساتتاعى بۇيىمداردى جانە مەديتسينا تەحنيكاسىن ۇلتتىق ساراپتاۋ ورتالىعى باس ديرەكتورىنىڭ مىندەتىن اتقارۋشى قانات ەرجانوۆ ايتىپ بەردى، دەپ حابارلايدى قازاقپارات ءتىلشىسى.
«ءبىزدىڭ ورتالىق دارىلىك زاتتار مەن مەديتسينالىق بۇيىمدار سالاسىنداعى مەملەكەتتىك ساراپتاۋ ۇيىمى بولىپ تابىلادى. ياعني، قازاقستان رەسپۋبليكاسىنىڭ اۋماعىندا وتكىزىلەتىن دارىلەر مەن مەديتسينالىق بۇيىمداردىڭ ساپاسى مەن قاۋىپسىزدىگىن قامتاماسىز ەتەمىز. باسقا سوزبەن ايتقاندا، دارىلىك پرەپاراتتار مەن دارىلىك بۇيىمداردىڭ قازاقستاندىق ءدارىحانالاردىڭ سورەلەرىنە تۇسۋىنە دەيىن ءبىز ولاردى كەشەندى ساراپتامادان وتكىزە وتىرىپ، قاۋىپسىزدىگىن، تيىمدىلىگىن جانە ساپاسىن، سونداي-اق بەلگىلەنگەن تالاپتارعا سايكەستىگىن باعالايمىز»، - دەدى قانات ەرجانوۆ.
ونىڭ ايتۋىنشا، ۇلتتىق ورتالىق ءدارى-دارمەكتى ءۇش ساتىدان تۇرتىن تەكسەرىستەن وتكىزەدى. ولاردىڭ ءبىرىنشىسى - باستاپقى ساراپتاما، ەكىنشىسى - مامانداندىرىلعان ساراپتاما، ال ءۇشىنشىسى - زەرتحانالىق سىناق. ۇلتتىق ورتالىقتىڭ وبلىستاردا زەرتحانالارى بار.
قانات ەرجانوۆ ءوز سوزىندە اتاپ وتكەندەي، ۇلتتىق ورتالىق بىلتىر ەۋرازيالىق ەكونوميكالىق وداقتىڭ فارماتسيەۆتيكالىق نارىعىنا شىعۋ ماقساتىندا اۋقىمدى جۇمىس جۇرگىزگەن. وسىنىڭ ناتيجەسىندە قازاقستان ە ا ە و ەلدەرىنىڭ اۋماعىندا مەديتسينالىق باعىتتا قولدانۋعا ارنالعان دارىلىك پرەپاراتقا ءبىرىنشى تىركەۋ كۋالىگىن بەرگەن. سونىمەن قاتار، ە ا ە و شەڭبەرىندە قازاقستان 2018-جىلى رەفەرەنتتى مەملەكەت رەتىندە دارىلىك زاتتار ساراپتاماسىن جۇرگىزۋگە شەتەلدىك جانە وتاندىق فارماكولوگيالىق وندىرۋشىلەردەن 23 ءوتىنىم قابىلداعان.
«2018-جىلى ءبىزدىڭ ورتالىق بارلىعى 6,5 مىڭنان استام دارىلىك زاتتار مەن مەديتسينالىق بۇيىمدارعا ساراپتاما جاسادى. بۇل 2017-جىلمەن سالىستىرعاندا 18 پايىزعا كوبىرەك. سونىمەن بىرگە، ورتالىق قىزمەتكەرلەرى 63 مىڭعا جۋىق مەديتسينالىق ءونىمنىڭ قاۋىپسىزدىگى مەن ساپاسى تۋرالى قورىتىندى بەردى»، - دەيدى قانات ەرجانوۆ.