جىلىتۋ پەشتەرىن قالاي پايدالانعان ءجون - ماماندار كەڭەسى
قازىرگى ۋاقىتتا وبلىستىڭ بارلىق قالاسى مەن اۋدانىندا ءورت قاۋىپسىزدىگىن باقىلاۋ بويىنشا تۇرعىندارمەن كەزدەسۋلەر وتكىزىلۋدە. مامانداردىڭ ايتۋىنشا، جادىنامالار مەن اقپاراتتىق پاراقشالاردى تاراتۋ دا ءورت قاۋىپسىزدىگىن ساقتاۋعا سەپتىگىن تيگىزەدى.
«اقپان ايىنىڭ ايازدى كۇندەرى قوستاناي وبلىسى ت ج د قىزمەتكەرلەرى ۇيلەردەگى ەلەكتر سىمدارى مەن جىلىتۋ پەشتەرىنىڭ جاي-كۇيىن بايقاۋ، جەكە سەكتور تۇرعىندارىنا ءورت قاۋىپسىزدىگى قاعيدالارىن ساقتاۋ تۋرالى ەسكە سالۋ ءۇشىن اۋلالاردى ارالادى. كوميسسيا قۇرامىندا ءورت سوندىرۋشىلەر مەن پوليتسيا قىزمەتكەرلەرى، سونداي-اق اتقارۋشى ورگانداردىڭ جانە حالىقتى الەۋمەتتىك قورعاۋ وكىلدەرى بار. ماسەلەن، «ەليەۆاتورشيك» قوعامدىق ساياجايى گازداندىرىلماعان، سوندىقتان قىس مەزگىلىندە نەگىزگى جىلۋ كوزى - پەش جاعۋ. جىلىتۋ پەشتەرى مەن ەلەكتر جابدىقتارى تالاپقا ساي بولۋى ءتيىس»، - دەپ اتاپ ءوتتى ۆەدومستۆوداعىلار.
دەپارتامەنت قىزمەتكەرلەرى جۇرگىزگەن رەيد شارالارى بارىسىندا تۇرعىنداردىڭ جىلىتۋ پەشتەرىنە سالعىرت قارايتىندىعى بايقالدى. اتاپ ايتقاندا، جەكە ۇيلەردىڭ ىشىندەگى ەلەكتر سىمدارى جاڭارماعان. سونىمەن قاتار، پەشتىڭ الدىندا قاڭىلتىر پاراقشالارى بولۋى كەرەك. كوپتەگەن اقاۋلىقتار ۇساق-تۇيەكتەردەن باستالادى دەپ ەسكەرتەدى ت ج د وكىلدەرى.
«ءۇي-جايلاردى جىلىتۋ ءۇشىن ەلەكتر جىلىتۋ قۇرالدارى پايدالانىلادى. سونىڭ ىشىندە قولدان جاسالعان پەشتەر ۇنەمى قاۋىپسىز ەمەس. سىمداردىڭ وقشاۋلاماسى تۇتانۋى ابدەن مۇمكىن. سوندىقتان ەلەكتر جىلىتقىشتى پايدالانۋ كەزىندە بارىنشا ساق بولۋ كەرەك. ارنايى زاۋىتتاردان شىققان پەشتەردى قولدانۋ ۇسىنىلادى. ۇيدەن شىعار كەزدە ولاردى ءسوندىرىپ وتىرعان دۇرىس»، - دەپ ەسكەرتەدى ماماندار.
بۇعان دەيىن وبلىستىق ت ج د بوران مەن ايازدا جولدا قالىپ قويعان كولىك جۇرگىزۋشىلەرىنە بارىنشا ساق بولۋ كەرەكتىگىن ەسكەرتكەن ەدى.