تىلشىلەر مەن الەۋمەتتىك جەلى بەلسەندىلەرى اراسىندا «تۇركىستاندى بىرگە تۇلەتەيىك» بايقاۋى وتكىزىلەدى
ۇيىمداستىرۋشىلاردىڭ ايتۋىنشا، جاڭا وبلىس ورتالىعى - تۇركىستان قالاسىن تۇركى الەمىنىڭ رۋحاني مەكەنىنە اينالدىرىپ، تۋريستەردى تارتۋ ماقساتىندا بارلىق سالادا تۇبەگەيلى بەتبۇرىس جاسالىپ، اۋقىمدى جۇمىستار اتقارىلۋدا.
كونە شاھاردى دامىتۋدىڭ كەشەندى جوسپارلارى مەن وڭتايلى وزگەرىستەرىن كەڭ كولەمدە ناسيحاتتاۋ تۇرعىسىندا وبلىس اكىمدىگى قولداۋىمەن «تۇركىستاندى بىرگە تۇلەتەيىك» رەسپۋبليكالىق بايقاۋى وتكىزىلەدى.
2019-جىلدىڭ 1- اقپانى مەن 10- ماۋسىم ارالىعىندا وتەتىن شاراعا كاسىبي جۋرناليستەر مەن الەۋمەتتىك جەلى بەلسەندىلەرى قاتىسىپ، اۆتورلىق ماقالالار مەن بەينەتۇسىرىلىمدەرىن جولداي الادى.
ۇسىنىلعان جۇمىستار ۇزدىك گازەت پەن سايت ماتەريالدارى، الەۋمەتتىك جەلىدەگى جاريالانىمدار (فەيسبۋك پەن ينستاگرام)، ۆيدەوحوستينگىندەگى يميجدىك بەينەتۇسىرىلىم اتالىمدارى بويىنشا قاراستىرىلادى.
سونداي-اق، ماتەريالداردىڭ سانى مەن كولەمىنە شەكتەۋ قويىلمايدى. الەۋمەتتىك جەلىدەگى تارالىمى مەن ساپاسىنا، مازمۇنىنا ءمان بەرىلەدى. ماتەريالدار مەن جازبالار الەۋمەتتىك جەلىدە #تۇركىستاندى بىرگە تۇلەتەيىك حەشتەگىمەن جاريالانىپ، سىلتەمەسى qanshaiym777@gmail.com پوشتاسىنا جىبەرىلۋى ءتيىس.
الەۋمەتتىك جەلىنى پايدالانۋ ەتيكاسى مەن قۇقىقتىق ەرەجەلەر ساقتالۋى مىندەتتى.
«جۇلدەگەرلەر ءار اتالىم بويىنشا ماراپاتتالادى. 1- ورىنعا - 350 مىڭ تەڭگە، 2- ورىن - 250 مىڭ تەڭگە، 3- ورىنعا - 150 مىڭ تەڭگە بەرىلەدى. ۇزدىك شىققان 9 جەڭىمپاز تۇركىستان قالاسىندا وتەتىن ماراپاتتاۋ راسىمىنە شاقىرىلىپ، وبلىس كولەمىندە جوسپارلانعان پرەسس-تۋرعا قاتىسادى»، - دەلىنگەن حابارلامادا.