تەمىرجول بيلەتتەرىن ساتۋدىڭ جاڭا جۇيەسى ەنگىزىلەدى

استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى تەمىرجول بيلەتتەرىن زاڭسىز ساتۋ سالاسىنداعى تەكسەرىستىڭ ناتيجەسىن جاريالادى، دەپ حابارلايدى قازاقپارات ءتىلشىسى.

جەمقورلىققا قارسى ساياسات دەپارتامەنتىنىڭ ديرەكتورى دانيار سابىربايەۆتىڭ ايتۋىنشا، بىلتىردان بەرى تەمىرجولمەن جولاۋشىلاردى تاسىمالداۋ سالاسىندا اۋقىمدى تەكسەرىستەر ۇيىمداستىرىلدى. سونىڭ ناتيجەسىندە كوپتەگەن زاڭ بۇزۋشىلىقتار انىقتالدى.

«بىرىنشىدەن، جۇمىسقا الۋ بويىنشا سىبايلاس جەمقورلىقتىڭ قاۋپى جوعارى. سەبەبى بارلىق قۇجاتتار قاعاز جۇزىندە جۇرگىزىلەدى. ەلەكتروندى تەستىلەۋ ءالى كۇنگە دەيىن جوق. بۇدان بولەك، سىبايلاس جەمقورلىققا قاتىستى شەكتەۋلەر دە، قىزمەت كورسەتۋ ستاندارتتارى دا ەنگىزىلمەگەن» - دەدى د. سابىربايەۆ استانادا وتكەن باسپا ءسوز ءماسليحاتىندا.

ونىڭ سوزىنە قاراعاندا، تەمىرجول بيلەتتەرىن زاڭسىز ساتۋ سالاسىندا دا ءتارتىپ جوق. بىلتىر ەكى ايدىڭ ىشىندە قوعامدىق باقىلاۋدىڭ ناتيجەسىندە زاڭسىز بيلەت ساتۋدىڭ بارلىق تىزبەگى انىقتالدى.

«بىلايشا ايتقاندا، كاسسادا بيلەت جوق دەيدى دە، وزدەرى جاسىرىن بيلەت ساتىپ وتىرادى. زاڭسىز بيلەت ساتۋ سحەماسىنا ۆوكزال قىزمەتكەرلەرىنەن باستاپ تەمىرجول كۇزەتى مەن پويىز باستىعىنا دەيىن كىرەدى. نەگىزى، برونداۋ قىزمەتى بيلەتتەردى ەركىن ساۋدادان شىعارىپ، جاسىرىن ساتۋعا مۇمكىندىك بەرىپ وتىر»، - دەپ اتاپ كورسەتتى د. سابىربايەۆ.

بۇگىندە «قازاقستان تەمىرجولى» ا ق- سى بيلەتتەردى اسۋ «ەكسپرەسس» اۆتوماتتى جۇيەسى ارقىلى ساتىپ وتىرادى. اتالعان جۇيە 1972-جىلى ەنگىزىلدى.

«دەمەك، قازاقستان تەمىرجولى 47 جىل بۇرىن جاسالعان بيلەتتەردى ساتۋ جۇيەسىن قولدانىپ كەلەدى. اتالعان جۇيە بىردە-ءبىر مەملەكەتتىك بازاعا قوسىلماعان. قانشا بيلەت الامىن دەسەڭ، ءوز ەركىڭ. وسىنى الىپساتارلار دا پايدالانىپ وتىر. بيلەتتى كوپتەپ ساتىپ الادى دا، جولاۋشىلارعا قىمباتقا ساتادى. بۇعان دەيىن جاڭا جۇيەنى ەنگىزۋ ماسەلەسى كوتەرىلگەن. قۇزىرەتتى مەملەكەتتىك ورگان دا تاپسىرما بەردى. الايدا قازاقستان تەمىرجولى ءتيىستى شارالاردى قولعا العان جوق. اتالعان مەكەمەگە بيلەتتەردى ساتۋدىڭ جاڭا جۇيەسىن ەنگىزۋ كەرەك. ونسىز الىپساتارلىق تولاستامايدى»، - دەيدى د. سابىربايەۆ.

بۇگىنگى باسپا ءسوز ءماسليحاتىنا «جولاۋشىلار تاسىمالى» ا ق باس ديرەكتورىنىڭ ورىنباسارى دانيار نۇرماعامبەتوۆ تە قاتىستى.

ونىڭ ايتۋىنشا، 1972-جىلدان بەرى اسۋ «ەكسپرەسس» جۇيەسى ءبىر-اق رەت جاڭارتىلدى. 2000-جىلى ءبىرشاما وزگەرىستەر ەنگىزىلدى. دەگەنمەن، بۇگىندە اتالعان جۇيە ەسكىردى. ونى تەحنيك ماماندار دا راستاپ وتىر.

«ءيا، بيلەت ساتۋ جۇيەسى ەسكىرگەننەن كەيىن ماحيناتسيا جاساۋ جولدارى كوبەيىپ وتىر. ءوزىمىزدىڭ قىزمەتكەرلەرىمىز بار، جەكە مەنشىك كاسسالار بار. ءبىز ونى دا جاقسى بىلەمىز. الداعى ۋاقىتتا ءبىز جاڭا جۇيەنى ەنگىزۋدى كوزدەيمىز. ول ءۇشىن شەتەلدىك تاجاريبەنى زەردەلەپ شىقتىق. جوسپار بويىنشا وسى جىلدىڭ اياعىنا دەيىن ءبىز جاڭا جۇيەنى پيلوتتىق رەجيمدە سىناپ كورەمىز. سودان كەيىن ەنگىزەتىن بولامىز. بۇدان ەرتە جاساي المايمىز»، - دەيدى د. نۇرماعامبەتوۆ.