ايتا كەتسەك، «حابار» ارناسىنداعى «اشىق ديالوگ» باعدارىندا جۇرگىزۋشى داۋرەن ابايەۆتان ەلورداداعى بەس بالانىڭ ولىمىنە قاتىستى سۇراق قويعان ەدى.
«شىنىندا دا، وتە قايعىلى جاعداي بولدى. پرەزيدەنت قايتىس بولعان بالالاردىڭ اتا-اناسى مەن تۋىستارىنا كوڭىل ايتا وتىرىپ، مۇنداي جاعدايدىڭ ەشقاشان قايتالانباۋى ءۇشىن ءتيىستى تاپسىرما بەردى. قازاقتا «اتام-اي دەپ جىلاتساڭ دا، بوتام-اي دەپ جىلاتپا» دەگەن ءسوز بار. ءوزىڭىز بىلەتىندەي، كۇنى كەشە عانا ەلىمىزدەگى ازاماتتاردىڭ تابىسىن ارتتىرىپ، ءومىر ساپاسىن جاقسارتۋ باعىتىندا جۇمىس توبى قۇرىلعان بولاتىن. سونىمەن بىرگە، كوپبالالى وتباسىلاردى قولداۋ شارالارىن كۇشەيتۋ تۋرالى مىندەت جۇكتەلگەن ەدى. ول جۇمىس توبىن ۆيتسە-پرەمەر ەربولات اسقاربەك ۇلى دوسايەۆ باسقاردى»، - دەدى داۋرەن ابايەۆ.
ءمينيستردىڭ ايتۋىنا قاراعاندا، جۇمىس توبىنىڭ قىزمەتىن مەملەكەت باسشىسىنىڭ ءوزى ءجىتى باقىلاۋىنا الماق.
«جۇمىس توبى ۇسىنعان شارالار انالارعا كورسەتىلەتىن الەۋمەتتىك قولداۋ تەتىكتەرىنىڭ تيىمدىلىگىن ارتتىرارىنا سەنىمدىمىن»، - دەپ ءتۇيدى داۋرەن ابايەۆ.
ەسكە سالا كەتسەك، اقپارات جانە كوممۋنيكاتسيالار ءمينيسترى داۋرەن ابايەۆ بۇعان دەيىن ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆانىڭ وتستاۆكاعا كەتۋى جونىندەگى الەۋمەتتىك جەلىدەگى تالاپقا قاتىستى پىكىرىن بىلدىرگەن بولاتىن.
«الايدا، مەنىڭ ويىمشا، بالالاردىڭ ولىمىنە مينيستر ءابىلقاسىموۆاعا عانا بار كىنانى ارتۋ ادىلەتسىز بولار ەدى. كەلىسەمىن، ەشكىم دە جاۋاپكەرشىلىكتەن جالتارماۋى كەرەك. اينالىپ كەلگەندە، ءبىز - بۇكىل مەملەكەتتىك اپپارات - ەلىمىزدە بولىپ جاتقان بارلىق جايلارعا جاۋاپتىمىز.
ءبىر نارسەنى ءتۇسىنۋىمىز كەرەك، وسى قايعىلى وقيعاعا ءبىر عانا ەمەس، بىرنەشە فاكتور سەبەپ بولدى جانە بارلىق ماسەلەنى ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسى شەشە الادى دەۋگە كەلمەيدى. ءمادينا ەراسىل قىزىنىڭ ءوزى دە، ايەل رەتىندە، ءۇش بالانىڭ اناسى رەتىندە بۇل جاعدايدى اۋىر قابىلدادى. سول سەبەپتى، تەك كونسترۋكتيۆتى سىن قالىپ، ارانداتۋ توقتايدى دەگەن ۇمىتتەمىن. ونىڭ ۇستىنە مەن مينيستر ءابىلقاسىموۆانى ءوز ىسىنە ادال كاسىبي مامان رەتىندە بىلەمىن»، - دەگەن ەدى داۋرەن ابايەۆ.