عالىمدار جوبالارىن فەرمەرلەرمەن كەلىسىپ وتىرۋى ءتيىس - ءو. شوكەيەۆ

بۇل تۋرالى بۇگىن ق ر پرەمەر-ءمينيستىنىڭ ورىنباسارى - اۋىل شارۋاشىلىعى ءمينيسترى ءومىرزاق شوكەيەۆ ايتتى، دەپ حابارلايدى قازاقپارات ءتىلشىسى.

مينيسترلىكتىڭ كەڭەيتىلگەن القا ماجىلىسىندە ۇلتتىق اگرارلىق عىلىمي ءبىلىم بەرۋ ورتالىعىنىڭ باسشىسى ۇلان تاجىبايەۆ بايانداما جاساپ جاتقان بولاتىن. ورتا جولدا ونى توقتاتقان ءومىرزاق شوكەيەۆ ستاتيستيكامەن اۋەستەنبەي ناقتى ماسەلەنى تالقىلاۋعا شاقىردى.

«زەرتحانالاردا، كابينەتتەردە، كومپيۋتەرلەردە ورىن الىپ جاتقان «تالمۋدتاردى» الىپ كەلىڭدەرشى، مۇلدەم قىزىعى جوق. ەگەر سىزدەر بىردەڭە جاساي الاتىن بولساڭدار، ەگىستىككە بارىڭدار، سول جەردە بىلىمدەرىڭدى ودان ارى قالاي تاراتاتىندىقتارىڭدى كورسەتىڭدەر. كوكتەمدە ەگىپ، جاز بويى جۇمىس ىستەپ، كۇزدە كورسەتىڭدەر. قازىر اگەەنكو (اندرەي اگەەنكو-قازاق ەگىنشىلىك جانە وسىمدىك شارۋاشىلىعى ع ز ي ديرەكتورى) بايانداما جاسايدى، ول وسى سحەما بويىنشا جۇمىس ىستەيدى»، - دەدى مينيستر.

وسى رەتتە عالىمدار ءۇشىن فەرمەرلەردىڭ پىكىرلەرى دە ماڭىزدى ەكەندىگىنە نازار اۋدارتتى.

«وعان فەرمەرلەر دە شاقىرىلۋى ءتيىس. ازىرلەمەلەردىڭ قاجەتتىگىنە نە قاجەتسىزدىگىنە فەرمەلەر باعا بەرەدى. ولار ۇستاپ كورىپ: «ءيا، مىناۋ دۇرىس، مۇنى قابىلداۋعا بولادى. ءبىراق، ءبىزدىڭ سۇراقتارىمىز بار»، دەپ ايتۋى كەرەك. سودان كەيىن مۇنىڭ بارلىعى ع ز ي- گە قايتارىلىپ، ولار وزدەرى ويدان شىعارعان ەمەس، ءدال سول ماسەلەلەرمەن جۇمىس ىستەي باستايدى»، - دەدى ءو. شوكەيەۆ.

وسى رەتتە ۇلان تاجىبايەۆ زاماناۋي اگروتەحنولوگيالاردى ەنگىزۋدىڭ ارقاسىندا 2017-جىلمەن سالىستىرعاندا استىق ءتۇسىمىنىڭ كورسەتكىشى ەكى ەسەگە ۇلعايعانىن اتاپ ءوتتى. ماسەلەن، بارايەۆ اتىنداعى استىق شارۋاشىلىعى عىلىمي-وندىرىستىك ورتالىعى بازاسىنداعى 3 مىڭ گەكتار ەگىستىك القابىنان گەكتارىنا 25,4-26,7 تسەنتنەر ءونىم الىنعان.