لوندون كينوفەستيۆالىنە «بابالار مۇراسى» دەرەكتى فيلمى قاتىسادى

استانا. قازاقپارات - وتاندىق «بابالار مۇراسى» دەرەكتى فيلمى لوندون حالىقارالىق كينوفەستيۆالىنىڭ كونكۋرستىق باعدارلاماسىنا قاتىسادى، دەپ حابارلايدى قازاقپارات ءتىلشىسى «قازاق فيلم» كينوستۋدياسىنىڭ باسپا ءسوز قىزمەتىنە سىلتەمە جاساپ.

فەستيۆال 2019-جىلعى اقپان ايىنىڭ 16 مەن 23- ارالىعىندا وتەدى. كارتينا ەكى اتالىم «ۇزدىك قىسقامەتراجدى دەرەكتى فيلم» جانە «ۇزدىك قىسقامەتراجدى دەرەكتى فيلمدەگى مونتاج» بويىنشا باق سىناماق.

رەجيسسەر بەرىك جاحانوۆتىڭ اتالعان كارتيناسى ق ر مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسىندا «قازاقستاننىڭ تۇركى حالىقتارى» تسيكلى بويىنشا تۇسىرىلگەن.

بۇل دەرەكتى تسيكل قازاقستاندا تۇراتىن تۇركى ەتنوسىنا ارنالعان. «بابالار مۇراسى» فيلمىنەن بولەك تسيكلدا رەجيسسەر كاميلا ءابدىلدينوۆانىڭ «ءدام ءتۇسى»، ناديرا سادۋوۆانىڭ «ءجىپ»، سونداي-اق دينارا مانابايەۆانىڭ «چۋۆاشتار. قازاقستان - مەنىڭ ەكىنشى وتانىم» تۋىندىلارى بار. ءار فيلمنىڭ اۆتورى باس كەيىپكەر ارقىلى بەلگىلى ۇلتتىڭ ءداستۇرى، تۇرمىسى جانە مادەنيەتى جايلى ايتۋعا تىرىسقان.

«بابالار مۇراسى» فيلمى وزبەك دياسپوراسى تۋرالى ءسوز ەتەدى جانە وڭتۇستىك قازاقستاندا تۇراتىن اتالارىنىڭ ءىسىن جالعاستىرىپ، بەسىك ازىرلەۋمەن اينالىساتىن 47 جاستاعى ابديماننوپ زۋپاروۆتىڭ ءومىرى جايلى باياندايدى.

«فيلمىمىز وسىنداي ايتۋلى فەستيۆالگە قاتىسىپ وتىرعانىنا قۋانىشتىمىن. ءبارى دە ويداعىداي ءوتىپ، ءبىزدىڭ فيلمىمىزگە جۇلدە بۇيىرادى دەپ سەنەمىن. ويتكەنى كارتينا جاقسى شىقتى. فيلمدە ءومىر بار»، - دەيدى رەجيسسەر بەرىك جاحانوۆ.

جىل سايىن لوندون حالىقارالىق كينوفەستيۆالى ءوز شىعارماشىلىق الاڭىندا كينويندۋستريانىڭ ءتۇرلى وكىلدەرى - ەندى اياق باسىپ كەلە جاتقان كينوگەرلەر مەن كاسىبي رەجيسسەرلەردىڭ، ديستريبيۋتەرلەردىڭ باسىن قوسادى. فەستيۆال ءاردايىم كينونىڭ بارلىق فورماسى مەن جانرىنا اشىق، اسىرەسە كينوونەرىنىڭ جاس وكىلدەرىنە، كينەماتوگرافتىڭ دامۋ ۇلگىلەرىنە اسا نازار سالادى.

ەستەرىڭىزگە سالا كەتەيىك، «بابالار مۇراسى» فيلمى بىلتىر الماتىدا وتكەن VII حالىقارالىق «باستاۋ» كينوفەستيۆالىندە وراز ابىشيەۆ اتىنداعى جۇلدەنى يەمدەگەن بولاتىن.