سايلاۋ كوميسسيالارىندا ىستەيتىن مامانداردىڭ جالاقىسى قانداي؟
ق ر ورتالىق سايلاۋ كوميسسياسىنىڭ ءبولىم باستىعى داۋرەن ىسقاقوۆتىڭ ايتۋىنشا، بۇگىندە ەلىمىزدە 232 اۋماقتىق سايلاۋ كوميسسياسى بار. بۇدان بولەك، 9970 ۋچاسكەلىك سايلاۋ كوميسسيالارى قۇرىلعان.
«بيىلدان باستاپ ءاربىر اۋماقتىق كوميسسيادا تاعى ەكى ادام تۇراقتى تۇردە جۇمىس اتقارادى. ولاردىڭ سانى رەسپۋبليكا بويىنشا 464 ادامدى قۇرايدى. دەمەك، بارلىعى رەسمي تۇردە جۇمىسقا قابىلداندى. بۇرىن ولار قوعامدىق نەگىزدە قىزمەت اتقاراتىن. ەندى رەسمي تۇردە جۇمىس ىستەپ، جالاقى الادى. وبلىستىق دەڭگەيدە جالاقىنىڭ كولەمى 250 مىڭ تەڭگە كولەمىندە بەلگىلەنسە، اۋداندىق دەڭگەيدە 175 مىڭ تەڭگە تولەنەدى. بىزگە جاڭا ادامدار كەلدى. ولاردىڭ ىشىندە جاستار دا از ەمەس. 30 جاسقا دەيىنگى ازاماتتاردىڭ 13,6 پروتسەنتى ءبىزدىڭ كوميسسيالارعا كەلىپ جاتىر»، - دەدى د. ىسقاقوۆ جۋرناليستەرگە بەرگەن سۇحباتىندا.
ونىڭ سوزىنە قاراعاندا، سايلاۋ كوميسسياسىندا ىستەيتىن ادامدارعا جاسىنا قاراي شەكتەۋ جوق. بۇگىندە 78 جاستاعى ءبىر مامان قىزىلوردا وبلىسىندا جۇمىس ىستەسە، ەڭ جاس - 21 جاستاعى قىزمەتكەر الماتى قالاسىنىڭ مەدەۋ اۋدانىندا ەڭبەك ەتەدى. «ولار ايماقتاردا سايلاۋ پروتسەسىمەن اينالىسادى. تالداۋ جاسايدى، تۇگەندەۋ جۇمىسىن جۇرگىزەدى، ۋچاسكەلەردى سايلاۋعا دايىندايدى، ادىستەمەلىك جابدىقتاۋ بار جانە تاعىسىن تاعىلار»، - دەپ اتاپ كورسەتتى سايلاۋ پروتسەسىن ۇيىمداستىرۋ ءبولىمىنىڭ باستىعى.
ايتا كەتەيىك، بۇگىن ق ر ورتالىق سايلاۋ كوميسسياسى وتكەن جىلعى اۋىل اكىمدەرىن سايلاۋ قورىتىندىسىن جاريالادى. وعان سايكەس، بىلتىر ەلىمىزدە 600 گە جۋىق اكىم اۋىسقان. بيىل سايلاۋ كوميسسيالارىنىڭ بەس جىلدىق وكىلەتتىك مەرزىمى اياقتالىپ وتىر. وسىعان بايلانىستى جەرگىلىكتى جەردە كوميسسيالاردىڭ قۇرامى وزگەردى.