قاسىم- جومارت توقايەۆ: مەكتەپتەگى زورلىق-زومبىلىققا كوز جۇمىپ قاراۋعا بولمايدى

استانا. قازاقپارات - مەكتەپتەردەگى زورلىق-زومبىلىق - بۇل بارلىق مەملەكەتتىك ورگانداردىڭ جۇمىسىنداعى كەمشىلىك ەكەنىن مويىنداۋ قاجەت.

بۇل تۋرالى جاستار جىلىن وتكىزۋ اياسىندا تۇرعان ماقساتتارعا ارنالعان دوڭگەلەك ۇستەل وتىرىسىندا پارلامەنت سەناتىنىڭ ءتوراعاسى قاسىم-جومارت توقايەۆ ءمالىم ەتتى، دەپ حابارلايدى قازاقپارات.

«مەكتەپتەردە ورىن الىپ وتىرعان زورلىق-زومبىلىق جاعدايلارى - بۇل بارلىق مەملەكەتتىك ورگانداردىڭ جۇمىسىنداعى كەمشىلىك ەكەنىن مويىنداۋ قاجەت. بۇل ماسەلەگە كوز جۇمىپ قاراۋعا بولمايدى. وسى تۇيتكىلدىڭ شىعۋ سەبەپتەرىن انىقتاپ، مەكتەپتەردى جايلاعان قورقىنىش پەن ۇرەيدەن تۇبەگەيلى قۇتىلۋ ءۇشىن ناقتى شارالار قولدانۋ كەرەك. بۇل مۇعالىمدەردىڭ، اتا-انالار مەن جاستار ۇيىمدارىنىڭ، بارلىق دەڭگەيدەگى اكىمدەردىڭ جانە تۇتاس قوعامنىڭ الدىنداعى ماڭىزدى مىندەتكە اينالۋى ءتيىس»، - دەدى ق. توقايەۆ.

وسى ورايدا ول ەل مەكتەپتەرىندەگى قورقىتۋ، زورلىق-زومبىلىق، كەمسىتۋ جاعدايلارى قوعامدىق رەزونانس تۋدىرعانىن ەسكە سالدى.

ونىڭ سوزىنە قاراعاندا، بۇل پروبلەما بارشا الەمدە كەڭىنەن تارالىپ وتىر. يۋنيسەف بالالار قورىنىڭ مالىمەتىنشە، الەمدە 13-15 جاستاعى ءاربىر ەكىنشى وقۋشى، بۇل شامامەن 150 ميلليون بالا مەكتەپتە قاتارلاستارى تاراپىنان قىسىم كورەدى.