ساراپشى: پرەزيدەنتتىڭ قوعاممەن تىلدەسۋدە ءتيىمدى مەديافورماتتارى تۇراقتى ترەندكە اينالا باستادى
ق ر پرەزيدەنتىنىڭ جانىنداعى ق س ز ي ديرەكتورىنىڭ ورىنباسارى، ساياسي عىلىمدارىنىڭ كانديداتى ءمادينا نۇرعاليەۆا پرەزيدەنتتىڭ كەشەگى مالىمدەمەسىنە قاتىستى وسىلاي پىكىر ءبىلدىردى، دەپ حابارلايدى قازاقپارات ءتىلشىسى.
«قازاقستان، سونداي-اق پوستكەڭەستىك كەڭىستىكتەگى كوپتەگەن ەلدەر ءۇشىن مەملەكەت باسشىسىنىڭ قىزمەتىنە ەرەكشە كوڭىل ءبولۋ ءتان. ادەتتە، قازاقستان رەسپۋبليكاسى پرەزيدەنتىنىڭ كەز-كەلگەن مالىمدەمەسى، سويلەگەن سوزدەرى، باستامالارى، شەشىمدەرى، زاڭدارى مەن باسقا دا ارەكەتتەرى بىردەن نەگىزگى ساياسي كۇنتارتىبىنە يە بولادى. بيلىك ءترانزيتى جانە كەزەكتى سايلاۋ سياقتى تالقىلاۋلار قازىرگى زامانعى كوممۋنيكاتسيالىق تەحنولوگيالاردىڭ ەسەبىنەن جاھاندىق ترەند بولىپ، ودان سايىن وزەكتىلىگىن ارتتىرادى»، - دەيدى ساراپشى.
ءمادينا نۇرعاليەۆانىڭ ايتۋىنا قاراعاندا، پرەزيدەنتتىڭ كونستيتۋتسيالىق كەڭەسكە ۇندەۋى بۇقارالىق اقپارات قۇرالدارىندا جانە الەۋمەتتىك جەلىلەردە پىكىرتالاس تۋدىرعان. ساراپشى پىكىرتالاستاردىڭ كولەمى مەن گەوگرافياسى وتە كەڭ ەكەنىن، بۇقارالىق اقپارات قۇرالدارى بۇل ءوتىنىشتى بەلسەندى تۇردە تالقىلاپ جاتقانىن ايتادى.
بۇل سىرت ەلدەردىڭ ساياسي پروتسەستەرگە، اسىرەسە ن. ءا. نازاربايەۆ تۇلعاسىنا ەرەكشە نازار اۋداراتىنىن تاعى دا كورسەتىپ وتىر.
«شىن مانىسىندە، كونستيتۋتسيالىق كەڭەسكە تۇسىندىرمە بەرۋ تۋرالى ءوتىنىش ادەتتەگى تەحنيكالىق جانە قۇقىقتىق ءراسىم. 1996-جىلعى قاڭتاردان باستاپ قازىرگى ۋاقىتقا دەيىن كونستيتۋتسيالىق كەڭەس مەملەكەت باسشىسىنىڭ، پارلامەنت پالاتالارىنىڭ جانە دەپۋتاتتاردىڭ، پرەمەر-ءمينيستردىڭ باستاماسىمەن 200 گە جۋىق ءوتىنىش قابىلدادى. وسىنىڭ ءبارى قازاقستاندا كونستيتۋتسيالىق باقىلاۋ ينستيتۋتىنىڭ عانا ەمەس، سونداي-اق كونستيتۋتسيالىق كەڭەس شەشىمدەرىن اقپاراتتىق قولداۋ دا كۇشەيىپ كەلە جاتقانىنىڭ دالەلى. ارينە، بۇل قۇقىقتىق مەملەكەتتە جاقسى تاجىريبە ەكەنىن مويىنداۋ قاجەت»، - دەيدى ول.
مادينا نۇرعاليەۆا وسىعان بايلانىستى مەملەكەت باسشىسىنىڭ وتىنىشىنەن كەيىن كەلەسى كۇنى بىردەن بەينە-تۇسىندىرمە جاساۋى جاڭا ءۇردىس ەكەنىن اتاپ ءوتتى.
«قوعاممەن ءوزارا ارەكەتتەسۋ ءۇشىن جاڭا ءتيىمدى مەديافورماتتاردى بەلسەندى پايدالانۋ قازىر تۇراقتى ترەند بولا باستادى. مەملەكەت باسشىسىنىڭ قاتىسۋىمەن قاڭتاردا وتكەن قازاقستانداعى جاستار جىلىنىڭ اشىلۋى بۇل فاكتىنى تەك راستايدى. قوعامداعى اقپاراتتىق ميفتەرگە، ستەرەوتيپتەرگە جانە بولجامدارعا جەدەل رەاكتسيا، اسىرەسە مۇمكىن بولاتىن سايلاۋ تۋرالى اقپاراتقا قاتىستى جەدەل تۇسىندىرمە بەرۋى پرەزيدەنتتىڭ بارلىق ۇدەرىستەردەن حاباردار ەكەنىن كورسەتەدى. بۇل تەك ساياسي ۇدەرىستەرگە عانا ەمەس، سونىمەن قاتار ەلدە ورىن الىپ جاتقان وقيعالارعا دا، وكىنىشكە وراي، قايعىلى وقيعالارعا دا قاتىستى. بەينە-تۇسىندىرمە بەرگەن كۇنى پرەزيدەنت استاناداعى ورتتەن قايتىس بولعان بالالاردىڭ اتا-انالارىنا جانە جاقىندارىنا كوڭىل ايتتى. اۋىر جانە قيىن ساتتە ادامدارعا جاقىن بولۋ - ەڭ ماڭىزدى ءارى ءبىر مەزگىلدە كۇردەلى مىندەت. وسى تۇرعىدان العاندا، قازىرگى ۋاقىتتا پرەزيدەنت ن. نازاربايەۆ كەز-كەلگەن جاعدايدا حالىق پەن مەملەكەتتىك بيلىك بىرلىگىنىڭ ءمىنسىز كەپىلى بولىپ تابىلادى»، - دەپ ءتۇيدى ءمادينا نۇرعاليەۆا.
ەسكە سالا كەتسەك، بۇعان دەيىن ق ر پرەزيدەنتى نۇرسۇلتان نازاربايەۆ ەلىمىزدىڭ كونستيتۋتسيالىق كەڭەسىنە جۇگىنۋ سەبەبىن تۇسىندىرگەنىن حابارلاعان بولاتىنبىز.