ەلباسىنىڭ كونستيتۋتسيالىق كەڭەسكە جۇگىنۋىنە ساراپشىلار پىكىر ءبىلدىردى
«پرەزيدەنت 1995-جىلدان باستاپ 20 دان استام ءوتىنىش جولدادى. بۇل كادىمگى تەحنيكا مەن ءتارتىپ بولىپ سانالادى. كونستيتۋتسيالىق كەڭەستىڭ ءرولى دە سول. ياعني، ەشقانداي توتەنشە جاعدايدى مەڭزەپ تۇر دەپ ايتا المايمىن. ەلباسى بۇگىندە تىڭ فورمادا، قانشاما قابىلداۋلار وتكىزىپ، كوپتەگەن باعدارلامالىق قۇجاتتار قابىلدادى. سونداي-اق، «نۇر-وتان» پارتياسىنىڭ كەزەكتى سەزىنە دايىندىق جۇرۋدە. اۋقىمدى ستراتەگيالىق جوسپارلار كوزدەلۋدە. سوندىقتان كونستيتۋتسيالىق كەڭەس مەرزىمى نورماعا سايكەس وتەدى دەپ ويلايمىن. بۇل تۋرالى ەلباسىنىڭ ءوزى دە ايتىپ ءوتتى. قازىر پرەزيدەنتتىڭ وتستاۆكاعا كەتۋىنە ەش قاجەتتىلىك جوق»، - دەپ جازدى ساياساتتانۋشى ەربول ەدىلوۆ ءوزىنىڭ Telegram پاراقشاسىندا.
سونداي-اق، ساياساتتانۋشى تالعات قاليەۆ ەلباسىنىڭ كونستيتۋتسيالىق كەڭەسكە ءوتىنىش ءبىلدىرۋى زاڭدى ەكەنىن ايتا كەلە، ەل باسقارۋعا قاتىستى بارلىق سۇراقتار اتا زاڭمەن رەتتەلۋى ءتيىس دەپ ەسەپتەيدى.
«ارينە كونستيتسيالىق كەڭەسكە بەرىلگەن ءوتىنىش زاڭدى ءارى قيسىندى دۇنيە. كونستيتۋتسيا جوباسىن ازىرلەۋدە مەملەكەت باسشىسىنىڭ ەل باسقارۋدان ءوز ەركىمەن باس تارتۋى مۇمكىن ەكەندىگى ەشكىمنىڭ ويىنا كەلمەگەنى قىزىق. كەز كەلگەن جۇمىسشىنىڭ ەڭبەك جاعدايىندا ءوز ەركىمەن شارتتى بۇزۋعا قۇقىعى بار. جۇمىس بەرۋشى بار بولعان جاعدايدا، ءوزارا ارەكەتتەر ەڭبەك تۋرالى زاڭناما اياسىندا جۇرگىزىلەدى.
پرەزيدەنتكە جۇمىس بەرۋشى، ول سايلاۋشى، دەمەك حالىق. ءبىراق، ەلباسىنىڭ تىكەلەي باسشىسى جوق، سەبەبى ول مەملەكەتتەگى ەڭ جوعارى لاۋازىم يەسى. ەكەۋدىڭ بىرەۋىنىڭ ۇستانىمىنىڭ وزگەرمەسىنە كىم كەپىل؟ كونستيتۋتسيادا بارلىق ماسەلەلەر رەتتەلۋى ءتيىس» - دەپ جازدى تالعات قاليەۆ ءوزىنىڭ فەيسبۋك پاراقشاسىندا.
ەسكە سالساق، ۇستىمىزدەگى جىلدىڭ 4- اقپاندا رەسپۋبليكانىڭ كونستيتۋتسيالىق كەڭەسى قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ قازاقستان رەسپۋبليكاسى كونستيتۋتسياسىنىڭ 42-بابىنىڭ 3-تارماعىنا رەسمي تۇسىندىرمە بەرۋ تۋرالى ءوتىنىشىن كونستيتۋتسيالىق ءىس جۇرگىزۋگە قابىلدادى. كەلەسى كۇنى ەلباسى كونستيتۋتسيالىق كەڭەسكە جۇگىنۋ سەبەبىن ءتۇسىندىرىپ بەردى.