قىزمەتتە تابىستى بولۋدىڭ جولدارى
ءبارى تاڭەرتەڭ ۇيقىدان تۇرعاننان باستالۋى ءتيىس. الدىمەن ەرتە تۇرىڭىز: ەرتە تۇرعان قىز- كەلىنشەكتىڭ ءبىر ءىسىنىڭ ارتىق ەكەنىن بىلەسىز عوي. جۋىنىپ العان سوڭ اس بولمەسىنە كىرىپ، ءبىر ستاقان سۋ ءىشىڭىز.
ايناعا قاراپ، ءسۇرتىنىپ تۇرىپ، ءوز كوركىڭىزگە ءوزىڭىز ءسۇيسىنىڭىز. بۇگىن ءسىزدى جانعا جايلى كەرەمەت وقيعا كۇتىپ تۇرعانىن (ولاي بولماسا دا، سوعان ءوزىڭىزدى سەندىرىڭىز) ويلاڭىز. تاڭعى اسىڭىزدى اسىقپاي ءىشىپ الىڭىز.
كەشەدەن دايىنداپ قويعان كيىمدەرىڭىزدى كيىپ، اكسەسسۋارلارىڭىزدى تاعىپ، ۇيدەن جۇمىسقا 10-15 مينۋتقا ەرتە كەلەتىندەي ەسەپپەن شىعىڭىز.
قوعامدىق كولىكتە ەشكىممەن ۇرىسپاي، كەرىسىنشە اسەم كيىنگەن جاندارعا كوبىرەك كوڭىل اۋدارىڭىز. ەگەر ءوز كولىگىڭىزدە بولساڭىز، كولىك كەپتەلىسىندە تۇرعاندا بۇگىن ءسىزدى تەك جاقسى نارسەلەردىڭ كۇتىپ تۇرعانىن ەلەستەتىڭىز.
جۇمىستاعى ۇستەلدە قاجەتتى قالام- قاعازدان باسقا ەشتەڭەنىڭ بولماعانى جاقسى. تازا سۋ قۇيىلعان بوتەلكە مەن تازا ستاقان تۇرعانى ابزال. كۇنىنە 2 ليتر سۋ ءىشۋ قاجەتتىگىن ەسىڭىزگە سالا كەتەيىك.
ءار 1 ساعات سايىن ارىپتەستەرىڭىزگە كەدەرگى جاساماي، كوزگە، دەنەنى ءيىلتىپ- بۇگىلتىپ جاتتىعۋ جاساۋدى داعدىعا اينالدىرىڭىز.
ارىپتەستەرىڭىزبەن قارىم- قاتىناسىڭىز دۇرىس بولسىن. جۇمىس بارىسىندا كەلىسپەۋشىلىك بولادى. الايدا ونى تەك ىسكەرلىك قارىم- قاتىناستاعى پىكىر، كوزقاراس تۇرعىسىنان عانا قاراۋ كەرەك. ەگەر وزىڭىزبەن ءسوزى جارىساتىن ءبىر ارىپتەسىڭىزبەن بىرىگىپ الىپ، بولعان جايتتى تالقىلاساڭىز، ۇجىم اراسىندا كيكىلجىڭ، وسەك-اياڭ تۋدىرۋعا سەبەپشى بولاتىنىڭىز حاق. ارىپتەستەرىڭىزدىڭ كيىم كيىسى، ءجۇرىس- تۇرىسى ۇناماسا دا، ونى ءسوز ەتۋ ورىنسىز، قاجەت دەپ تاپسا، ونى اكىمشىلىكتىڭ ءوزى- اق جاسايدى.
ءوز شىعارماشىلىعىڭىزدى، دارىنىڭىزدى اشۋعا مۇمكىندىك بەرگەن جۇمىس ورنىڭىزعا ريزاشىلىعىڭىزدى ءبىلدىرىپ ءجۇرۋ، جۇمىس قابىلەتىڭىزدىڭ ودان ءارى اشىلا تۇسۋىنە ارقاۋ بولادى.
ءبىر ءىستى تولىق اياقتاعاسىن بارىپ، ەكىنشىسىنە كوشۋگە ادەتتەنگەنىڭىز ءجون. جالپى ءوز ءبىلىمىڭىزدى كوتەرۋ جولدارىن ويلاستىرىڭىز.
جۇمىس ۋاقىتىنىڭ ءبىتۋىن تاعاتسىزدانا كۇتۋدىڭ تەككە شارشاتاتىنى ەسىڭىزدە بولسىن. ونىڭ ەسەسىنە بۇگىنگى جاساعان جۇمىسىڭىز ءۇشىن وزىڭىزگە العىس ايتىپ، ەرتەڭگى كۇننىڭ جوسپارىن جاساپ قويىڭىز. جۇمىس ۋاقىتى اياقتالعان سوڭ، ۇستەلدىڭ ءۇستىن تاپ- تۇيناقتاي ەتىپ جيناستىرىپ، ارىپتەستەرىڭىزبەن جىلى جۇزبەن قوشتاسىڭىز.