ەتتىڭ دەنساۋلىققا پايداسى

استانا. قازاقپارات - «ەت ەتكە، سورپا بەتكە» دەپ، ەتتى اسا ءسۇيسىنىپ جەيتىن حالىقپىز. دەسەك تە كەيبىرەۋلەر ەتتى قاتتى ۇناتا بەرمەيدى، ءتىپتى كەيبىرى ەتتى دۇرىس قورىتا الماي قينالادى.

 الايدا ەتتىڭ اعزا ءۇشىن پايداسى شاش ەتەكتەن ەكەنىن كوپشىلىك بىلە بەرمەيدى. ونى اس رەتىندە عانا ەمەس، شيپا ءۇشىن دە قابىلداعان دۇرىس. ەندەشە ەتتىڭ دەنساۋلىق ءۇشىن پايدالى تۇستارىن بىلە جۇرىڭىزدەر. ەرتەدە ەمشىلەرىمىز اسقازان دەرتىمەن سىرقاتتاناتىن ادامعا جاس مالدىڭ ەتىن سۇتكە ءپىسىرىپ بەرگەن. سەبەبى سۇتكە پىسكەن ەت اسقازانعا كۇش تۇسىرمەيدى جانە تەز قورىتىلادى. سونىمەن قاتار قۇرامى قورەكتىك زاتتارعا وتە باي بولعاندىقتان ادامعا كۇش- قۋات بەرەدى. سوندىقتان بۇگىندە جاسى 40 تان اسقان جاندار، اسىرەسە ايەلدەر قاۋىمى مۇنى اپتاسىنا نەمەسە ايىنا ءبىر رەت تۇتىنعانى ءجون. ويتكەنى ول اعزانى كالتسيمەن بايىتادى.

باسقا ءتورت تۇلىككە قاراعاندا قويدىڭ ەتىندە ا1, ۆ12, ۆ1 دارۋمەندەرى مول. قوي ەتىنىڭ قۇرامىندا كالتسي مەن فوسفور كوپ بولعاندىقتان، جارانىڭ نەمەسە ىسىكتىڭ بەتىنىڭ تەز قايتۋىنا كومەكتەسەدى. ول ءۇشىن جاڭا سويىلعان قوي ەتىن جۇقالاپ ءتىلىپ الىپ سول قاراكەسەك ەتتى جىلى كۇيىنشە ءىسىپ تۇرعان جەرگە نەمەسە جاراعا تاڭىپ قويۋ كەرەك. قويدىڭ ەتىنە قاراعاندا ەشكىنىڭ ەتى اۋىر بولادى ەكەن. ال قويدىڭ ەتى دەنەدەگى جىلۋ مەن ءال- اۋقاتتى ارتتىرادى، سونىمەن قاتار دەنەدەگى جەلدى باسىپ، تابەتىڭىزدى دە اشادى.

 جىلقى ەتىن ۇناتپايتىن جان جوق. ءدامى ءتىل ۇيىرەتىن قازى- قارتا قازاقتىڭ ۇلتتىق تاعامى. ونىڭ دەنساۋلىققا تيگىزەر پايداسى دا كوپ. ماسەلەن، ول ءىرىڭدى توقتاتىپ قانا قويماي، بۇيرەك پەن بەلدى جەلدەن تازارتادى ەكەن. سونىمەن قاترا جۇرەك- قان تامىر اۋرۋلارىنا، بۋىن سۇيەكتەرىنىڭ سىرقىراۋىنا، ىشكى اعزانىڭ دۇرىس جۇمىس جاساۋىنا تيگىزەر اسەرى مول جانە اعزا جاسۋشالارىن جاڭارتىپ وتىرادى. ياعني ەرتە قارتايۋدىڭ الدىن الادى.

 سيىردىڭ ەتى تەز قورىتىلمايدى جانە مايلى بولىپ كەلەدى. الايدا ول بۇيرەك، بەل مەن باستان ۇستاعان سۋىقتى شىعارۋعا كومەكتەسەدى. جالپى مال اتاۋلىنىڭ ءبارى جاسىنا قاراي سەمىرەدى. سوندىقتان جاسى ۇلكەيگەن سايىن ەتىنىڭ مايلىلىعى دا ارتا تۇسەدى. سيىر ەتىنىڭ مايىندا قانىققان ماي قىشقىلدارى باسىم. مايى توڭداپ تۇرادى جانە ول اعزاعا تۇسكەندە حولەستەرين ۇلەسىنىڭ ارتۋىنا سەبەپ بولادى. سول سەبەپتى ەتىندە گەموگلوبين، اقۋىز، دارۋمەندەر جىلقى ەتىنە قاراعاندا الدەقايدا از. ءىش مايدىڭ دا پايداسى بار. ول بۋىنداردىڭ سىرقاتى مەن كۇيىكتى جازادى. سونىمەن قاتار قۇلاق، باس، جاتىر سىرقاتتارىنان ارىلتادى. السىرەگەن، شارشاعان، قۋاتى مەن قانى ءالسىز قارتتار مەن بالالارعا ىشتەرىن تازارتۋعا، جەلدى شىعارۋعا پايدالى. سوندىقتان اندا- ساندا اعزا جاعدايىنا قاراي ماي جەپ تۇرعان دۇرىس. سوندا ادامنىڭ ىشكى قىزۋى ارتىپ، اعزاسى تازارىپ، دەنە كۇشى كەمىمەي، سەرگەك جۇرەدى.

 سۇرلەنگەن مايدىڭ دا شيپاسى كوپ. ول اقىلىنان اداسقان، ەسىنەن تانعان ادامدارعا كومەكتەسەدى جانە جاراقاتتىڭ جازىلۋىنا دا جاقسى اسەر ەتەدى. ال شىجعىرىلعان (كۇيدىرىلگەن) ماي ويدى وتكىرلەيدى، زەيىندى ارتتىرادى. دەنەگە جىلۋ مەن كۇش- قۋات بەرەدى. سۇيەكتىڭ مايى (جىلىكتىڭ مايى) جەلدى قۋىپ، ادامدى قۋاتتاندىرادى. ال تاۋىقتىڭ ەتى جاراقات العان كەزدە پايدالى. اعزاعا جەڭىل ءارى ەرتە ساۋىعىپ كەتۋگە اسەرى بار. ال بالىق -  اسقازان اۋرۋلارىنا ەم. كوزگە دە پايداسى بار. ەستەرىڭىزدە بولسىن، جانۋارلاردىڭ ىشىندە اتالىقتارىنىڭ كەۋدە جاعىنىڭ ەتى، ال انالىقتارىنىڭ بوكسە جاق ەتى، بۋازدارىنىڭ بارلىق ەتى اۋىر بولادى. ال كەرىسىنشە، مالدىڭ ىشىندە انالىقتاردىڭ، ال قۇستاردا اتالىقتاردىڭ ەتى اعزاعا جەڭىل بولادى. 

Massaget.kz