جاستار جىلىنا وراي ءمۇشايرا جاريالاندى
جاھاندانۋ داۋىرىندە قازاقستاننىڭ جارقىن بولاشاعى جالىندى جاستارعا ۇلكەن جول اشىلماق. ازاتتىق اياسىندا تۋىپ جاس مەملەكەتىمىزدىڭ جاڭا استاناسىمەن قاتار قانات جايىپ ءوسىپ كەلە جاتقان بۇگىنگى جاستاردىڭ رۋحى بيىك، ارمانى اسقاق. «ەل بولامىن دەسەڭ، بەسىگىڭدى تۇزە» دەگەندەي، ىرگەسىن بەكىتىپ، الەمگە تانىلىپ وتىرعان ءبىزدىڭ ەلىمىز ءۇشىن دارىندى، ءبىلىمدى، جىگەرلى ۇرپاقتاردىڭ ورنى تىپتەن بولەك. ەندەشە «جاستار جىلى» اياسىندا استانا قالاسى اكىمدىگىنىڭ قولداۋىمەن ساكەن سەيفۋللين مۋزەيى ءداستۇرلى رەسپۋبليكالىق اقىندار ءمۇشايراسىن جاريالايدى. ەلىمىزدىڭ 35 جاسقا دەيىنگى جاس اقىندارىن الامان جىر بايگەسىنە قاتىسىپ، ءوز باقتارىن سىناۋعا شاقىرادى. ءمۇشايرا تاقىرىبى «جاستىقتىڭ وتى جالىنداپ.. .» .
حاكىم اباي ءسوزىن العا تارتىپ وتىرمىز. جاستار - قاي زاماندا بولماسىن اسقاق ارمان مەن ءۇمىت، بيىك ار مەن ءور نامىستىڭ سيمۆولى.
ارىستانداي ايباتتى،
جولبارىستاي قايراتتى -
قىرانداي كۇشتى قاناتتى. مەن جاستارعا سەنەمىن! - دەپ كەشە ماعجان جىرلاعان جاستار بۇگىندە ادەبيەت الەمىندە وزىندىك ورنەگىن سالىپ، قالىپتاسىپ كەلەدى. جاستار جىلى اياسىندا، تالانتتى جاستاردى قولداۋدى وزىمىزگە ماقسات ەتتىك. ءمۇشايراعا ەلىمىزدىڭ 35 جاسقا دەيىنگى جاس اقىندارى قاتىسا الادى. تاقىرىپقا شەكتەۋ جوق. ۇلى دالا توسىندە ماڭگىلىك ەل بولۋعا قادام باسقان قازاق ەلىنىڭ بۇگىنگى جارقىن كەلبەتىن، ەرتەڭگى ۇرپاق مۇراتىمەن ۇشتاستىرا جىرلاۋ اقىنداردىڭ ءوز شابىتىنا بايلانىستى. ەندەشە جۇيرىكتەردى جىر مارەسىندە كۇتەمىز! ءمۇشايرا جۇلدەلەرىنىڭ قارجىلاي كولەمى وتە قوماقتى:
باس جۇلدە - بىرەۋ
ءبىرىنشى ورىن - بىرەۋ
ەكىنشى ورىن - ەكەۋ
ءۇشىنشى ورىن - ۇشەۋ
ىنتالاندىرۋ سىيلىعى - بەسەۋ ءمۇشايراعا ەش جەردە جارىق كورمەگەن تولعاۋلار، توپتاما ولەڭدەر 2019 -جىلدىڭ ماۋسىم ايىنىڭ 1 نە دەيىن قابىلدانادى. ءمۇشايرا قورىتىندىسى استانا كۇنى قارساڭىندا جاريالانادى. ۇمىتكەرلەر شىعارماسىن كومپيۋتەردە تەرىپ، 5 داناسىن تومەندەگى مەكەن - جايعا جىبەرۋ كەرەك نەمەسە astanakalamger@mail.ru ەلەكتروندىق پوشتاعا جولداۋعا بولادى. اۆتوردىڭ اتى- ءجونى، مەكەن- جايى، بايلانىس تەلەفونى، ەلەكتروندىق پوشتاسى(بار بولسا) مىندەتتى تۇردە كورسەتىلۋى كەرەك.
يندەكس: 010000, استانا قالاسى، م. اۋەزوۆ كوشەسى 20 «ا» ءۇي، ساكەن سەيفۋللين مۇراجايى. جۇلدەگەرلەردىڭ استاناعا كەلىپ- كەتۋدەگى بارلىق شىعىنىن ۇيىمداستىرۋشى تاراپ موينىنا المايدى.
Massaget.kz