ءمادينا ءابىلقاسىموۆا ورتتەن كوز جۇمعان بالالاردىڭ اتا- اناسىنا بارىپ كوڭىل ايتتى
بۇل تۋرالى بۇگىن ۇكىمەت وتىرىسىنا كەيىن ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا ايتتى، دەپ حابارلايدى قازاقپارات ءتىلشىسى.
«ءبىز، مينيسترلىك وكىلدەرى قارا جامىلعان وتباسىنا بارىپ، كوڭىل ايتتىق. كەشە باردىق. ءمينيستردىڭ (ەڭبەك جانە حالىقتى الەۋمەتتىك قورعاۋ ءمينيسترى ءابىلقاسىموۆا) ءوزى دە باردى»، - دەدى سۆەتلانا جاقىپوۆا.
ايتا كەتەلىك، بۇگىنگى ۇكىمەت وتىرىسىنا مينيستر قاتىسقان جوق. ونىڭ ورنىنا پرەمەر- ءمينيستردىڭ الدىندا ۆيتسە-مينيستر سۆەتلانا جاقىپوۆا ەسەپ بەرگەن ەدى. ۆيتسە-ءمينيستردىڭ سوزىنە قاراعاندا، مينيستر م. ءابىلقاسىموۆا وتكەن اپتادان بەرى سىرقاتتانۋىنا بايلانىستى ەم الىپ جاتىر.
ب ا ق وكىلدەرى ۆيتسە-مينيستردەن «كوپبالالى وتباسىلارعا كورسەتىلەتىن مەملەكەتتىك قولداۋ جەتكىلىكتى مە؟» دەپ سۇراعان ەدى. وسىعان وراي، ول كوپبالالى وتباسىلاردى قولداۋ شارالارى قايتا قارالاتىنىن ايتتى.
سونداي-اق، جيىننان كەيىن تىلشىلەر ورتتەن قازا تاپقان بالالاردىڭ اتا-اناسىنىڭ نەلىكتەن تۇنگى كەزەكشىلىكتە بولعانىن سۇرادى.
«بۇل ولاردىڭ تاڭداۋى»، - دەپ جاۋاپ بەردى سۆەتلانا جاقىپوۆا.
ەسكە سالا كەتەيىك، 4 -اقپان كۇنى تۇندە «كوكتال-1» تۇرعىن ءۇي الابىندا جەكە ءۇيدىڭ اۋلاسىندا تۇرعىزىلعان ۋاقىتشا باسپانادان ءورت شىقتى. ءورتتى ءسوندىرۋ بارىسىندا 2006، 2008، 2014، 2016، 2018 -جىلدارى تۋعان 5 قىز بالانىڭ دەنەسى تابىلدى. ولاردىڭ ەڭ كەنجەسى نەبارى 11 ايلىق ءسابي ەدى.
قايعىلى وقيعا كەزىندە بەس بالانىڭ اتا-اناسى تۇنگى جۇمىستا بولعان. بۇگىن 5 بالانى ەلوردالىقتار اقتىق ساپارعا شىعارىپ سالدى. سونداي-اق، ەلباسى ورتتە قازا بولعان بالالاردىڭ وتباسىنا كوڭىل ايتتى.