تەڭىزدىڭ پايداسى: تۇزدى سۋ قانداي اۋرۋلاردى ەمدەيدى
تەڭىز سۋى قانداي اۋرۋلارعا ەم
تۇماۋ، گايموريت، سوزىلمالى رينيت. مۇرىندى تۇزدى سۋمەن شايۋ تىنىس الۋدى جەڭىلدەتەدى. سەبەبى، تەڭىز سۋى مۇرىننىڭ شىرىشتى قابىعىنا تۇسە وتىرىپ، بۋلانادى. سونىڭ ارقاسىندا تەڭىز سۋى مۇرىن قۋىسىنداعى ارتىق ىلعالدى الىپ تاستايدى جانە وسىلايشا ءىسىنۋدى جويادى. سونداي- اق، وسىنداي اسەرگە مۇرىنعا ارنالعان تامشىلاردى قولدانۋ ارقىلى قول جەتكىزۋگە بولادى. ءبىراق، تامشى تامىزعان جاعدايدا شىرىشتى قابىقشا تامىرلاردىڭ تارىلۋىنا بايلانىستى كىشىرەيەدى. دەگەنمەن، مۇرىن تامشىلارىنا قاراعاندا، تەڭىز سۋ جۇمساق اسەر ەتەدى جانە بەيىمدىلىك تۋدىرمايدى.
برونح- وكپەلىك اۋرۋلار. تەڭىز سۋىندا ەريتىن كالتسي، كۇكىرت جانە باسقا دا مينەرالدار، وعان قابىنۋعا قارسى جانە انتيميكروبتىق قاسيەتتەرىن بەرەدى. ال تىنىس الۋ جۇيەسىنىڭ دەنساۋلىعىن جاقسارتقىسى كەلەتىندەر دەمالىسقا شىعاتىن كەزدە جەرورتا تەڭىزى، قىرىم سەكىلدى قۇرعاق اۋالى كۋرورتتاردى تاڭداعانى دۇرىس.
سترەسستەن ارىلۋعا. تەڭىز سۋى يود جانە بروم قوسىلىستارىنا قانىققاندىقتان، كۇيزەلىستەن ارىلۋعا كومەكتەسەدى. بۇعان قوسا، تەڭىز سۋىندا جۇيكە جۇيەسىنىڭ ۇيلەسىمدى جۇمىسى ءۇشىن قاجەتتى ماگني كوپ. سونداي- اق، كۇن ۆاننالارى تەڭىز سۋىنىڭ سترەسسكە قارسى اسەرىن ارتتىرادى. ويتكەنى ماۋسىمدىق كوڭىل- كۇيدىڭ بۇزىلۋى كوبىنەسە كۇن ساۋلەسىنىڭ اسەرىنەن دەنەدە وندىرىلەتىن د ءۆيتامينىنىڭ جەتىسپەۋشىلىگىنەن پايدا بولادى.
تەرى اۋرۋلارى. ەسەكجەم، تەڭگە قوتىر، نەيرودەرميت جانە بەزەۋ سەكىلدى تەرى اۋرۋلارىن دا تەڭىز سۋىنا ءتۇسىپ ەمدەۋگە بولادى. ويتكەنى، تۇزدى سۋ تەرىنى ءسال قۇرعاتىپ، قابىنۋدى جويادى جانە تىندەردىڭ قالىپقا كەلۋىن جەدەلدەتەدى.
ارتىق سالماق. تەڭىز سۋى زات الماسۋ پروتسەسىن بەلسەندىرىپ، قان اينالىمىن ىنتالاندىرادى جانە دەنەدەگى ارتىق سۇيىقتىقتى شىعارادى. ال ارىقتاۋ اسەرى جوعارى بولۋ ءۇشىن سالقىن سۋدا شومىلۋ كەرەك.
جۇرەك- قان تامىرلارى اۋرۋلارى. كەز كەلگەن شومىلۋ تەمپەراتۋرانىڭ تومەندەۋىنە بايلانىستى تامىرلاردى جانە جۇرەكتىڭ بۇلشىقەتتەرىن جاتتىقتىرادى. ءبىراق، ونىڭ اۋىز سۋدان ايىرماشىلىعى تەڭىز سۋىنىڭ قۇرامىندا كالي بار. ال بۇل جۇرەك- قان تامىرلارىنىڭ ساۋ بولۋىنىڭ نەگىزگى ەلەمەنتى.
ءتىس جانە قىزىل يەك اۋرۋلارى. تەڭىز سۋىنىڭ قابىنۋعا قارسى قاسيەتتەرىنىڭ ارقاسىندا اۋىز قۋىسىنىڭ قىزىل يەگى ساۋلىلىعىن ساقتاسا، سۋدا ەرىتىلگەن كالتسيي ءتىس ءەمالىن قاتايتادى. ال تۇزدى بولشەكتەر ءتىس وڭەزىنىڭ جينالۋىن ازايتادى.
قيمىل- تىرەك اپپاراتى اۋرۋلارى. تەڭىز سۋى بۋىنداردىڭ قابىنۋىن جانە ءىسىنۋىن جويىپ، بۋىنداعى قان اينالىمدى جاقسارتادى جانە سۇيەكتەردى قاتايتادى.
شومىلۋ ەرەجەسى
سۋدا شومىلامىن دەپ قاتتى توڭىپ قالماۋ كەرەك. سۋدىڭ اسەرى بولۋ ءۇشىن 10-15 مينۋت شومىلۋ جەتكىلىكتى.
سۋدان شىققاننان كەيىن دۋشقا بىردەن جۇگىرمەڭىز. تۇز جانە پايدالى ەلەمەنتتەر 15 مينۋت بويى تەرىدە قالعانى دۇرىس. ءبىراق وسىدان كەيىن مىندەتتى تۇردە دۋشقا ءتۇسىڭىز. ويتكەنى، تەڭىز سۋىنىڭ اعزاداعى توكسيندەردى شىعاراتىن قاسيەتى بولعاندىقتان، دەنەنى مىندەتتى تۇردە شايۋ كەرەك. بۇدان باسقا، تۇزدى سۋ تەرىنىڭ بەتىندەگى تابيعي ىلعالدىلىقتى الىپ تاستايدى. ال بۇل اجىمدەردىڭ پايدا بولۋىنا اكەلەدى جانە كۇنگە كۇيۋ ىقتيمالدىعىن ارتتىرادى.
سونداي- اق، تەڭىز سۋىن ەم رەتىندە قولدانعىڭىز كەلسە تەڭىز جاعاسىنداعى سۋدى قولدانباڭىز. ول ءجيى لاستانعان بولادى. ال ەڭ تازا سۋ 2 مەتر تەرەڭدىكتە بولادى. سوندىقتان، سۋعا ءتۇسىپ، سۇڭگۋىڭىزگە تۋرا كەلەدى. ەگەر سۇڭگۋدى بىلمەسەڭىز، كەم دەگەندە جاعالاۋدان ءجۇزىپ ءوتىڭىز.
Stan.kz